Charter Document - 04100149
| Charter Number: | 04100149 |
|---|---|
| Cartulary Title: | Regensburg, Archiv des Katharinenspitals |
| Charter Language: | Latin |
| Charter Origin: | Religious |
| Charter Type(s): | Indulgence |
| Date: | 1295 |
| Date type: | Internal, A.D., Papal |
| Resource Link(s): |
Monasterium.net |
Charter:
Universis Christi fidelibus presentem litteram inspecturis Philippus Salarnitanus et Ruogerius Seuerinensis dei gracia archiepiscopi Maurus Ameliensis Ruopertus Calinensis et Franciscus Terracenen[sis] eadem gracia episcopi salutem in domino sempiternam Quoniam ut ait apostolus omnes stabimus ante tribunal Christi recepturi prout in corpore gessimus sive bonum fuerit sive malum oportet nos diem messionis extreme bonis operibus prevenire ac eternorum intuitu seminare in terris quod reddente domino cum multiplicato fructu colligere valeamus in celis spem firmam fiduciamque tenentes Quoniam qui parce seminat parce et metet et qui seminat in benedictionibus de benedictionibus metet vitam eternam Cum igitur in hospitali beate Katherine in pede pontis Ratisbonen[sis] civitatis debiles et egentes ac singuli Christiani de quibuscumque partibus Christianorum illuc confluencium benigne recipiantur et sincera in domino caritate pertractentur Nec illi hospitali ad hoc proprie suppetant facultates per quas illis ibidem infirmantibus et egentibus ac aliis illuc confluentibus valeat ministrare nisi elemosinis Christi fidelium subveniatur eidem Universitatem vestram monemus rogamus et in domino exortamur quatenus in remissionem vestrorum peccaminum de bonis vobis a deo collatis pias elemosinas et grata caritatis subsidia predicto hospitali irrogetis vosque per hec et alia bona que domino inspirante feceritis vitam eternam consequi valeatis Nos de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis qui predicto hospitali pro sustentacione predictorum infirmorum et egencium ac aliorum Christianorum illuc confluentium manus porrexerint adiutrices aut in extremis laborantes quicquam facultatum suarum legaverint hospitali pro predictis prelibato singuli singulis singulas dierum quadragenas de iniunctis eis penitenciis Dummodo consensus dyocesani ad id accesserit misericorditer in domino relaxamus In quorum testimonium presens scriptum sigillorum nostrorum munimine duximus roborandum Datum Lat[e]rani anno domini millesimo ducentesimo nonogesimo quinto pontificatus domini pape Bonifacii octavi anno primo