Charter Document - 04100148

Universis Christi fidelibus ad quos presens scriptum pervenerit Petrus Arborensis dei gracia archiepiscopus Saba Melitensis I Jacobus Parentinus Robertus Calinensis Cyprianus Bouensis Stephanus Opiden[sis] et Romanus Croen[sis] eadem gratia episcopi salutem in Domino sempiternam Quoniam ut ait apostolus omnes stabimus ante tribunal Christi recepturi prout in corpore gessimus sive bonum fuerit sive malum oportet nos diem messionis extreme bonis operibus prevenire ac eternorum intuitu seminare in terris quod reddente domino cum multiplicato fructu recolligere valeamus in celis firmam spem fiduciamque tenentes Quoniam qui parce seminat parce et metet et qui seminat in benedictionibus de benedictionibus metet vitam eternam Cum igitur in hospitali beate Katerine in pede pontis Ratisponensis pauperes infirmi debiles claudi et alii Christiani de quibuscumque partibus illic confluentibus benigne recipiuntur et sincere in domino caritate pertractentur Universitatem vestram monemus rogamus et in domino exortamur Quatinus in remissionem vestrorum peccaminum de bonis vobis a deo collatis pias elemosinas et grata caritatis subsidia predicto hospitali pro sustentatione predictorum erogetis vosque per hec et alia bona que Domino sperante feceritis adipisci possitis vitam eternam Nos de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis qui suas elemosinas ibidem largiti fuerint vel miserint hospitali prelibato singuli singulis singulas dierum quadragenas dummodo consensus dyocesani ad id accesserit misericorditer in domino relaxamus In cuius rei testimonium presens scriptum sigillorum nostrorum munimine duximus roborandum [] Datum Laterani anno domini millesimo ducentesimo nonogesimo quinto pontificatus domini pape Bonifacii octavi anno primo Item ultimo Maurus Ameliensis episcopus ordinis beati Bernhardi