Charter Document - 04100082

Ich Hawart der Svnchinger tvn chunt allen den die disen brief sehent oder horent lesen daz so getan erigen als der Gozwin het der Waller da ze Illenpach hove vnd hvbe vnd swaz so er da het versucht vnd vnversucht daz ich des salman bin her von minem vater vnd daz ovch ze reht in min hant bereht ist Dazselbe aigen hat div Wallerinne ir svn vnd ir tohter gegeben dem spital hin ze Regenspurch sand Katherin mit des Svnchingers hant der des gutes salman ist versucht vnd vnversucht als si iz het vnd ir wirt an alle ansprach vnd ainen zehenten ovz demselben gvte Dises gutes ist chovfer vnd werman gewesen her Chunrat der Puller von Sala vnd daz gelubde hat der Chunrat vnd der Svnchinger in genomen ze laisten dem spital daz aw frowe vnd iriv chint svlen gewern sin des gutes also der brief hie beschaidet zehen iar oder mer vor aller ansprach des spitals von Regenspurch Dir chovf vnd disiv stet ist geschehen des nehsten svnthages nah dem perhtag von vnsers herren gebvrt tavsent iar zweihvndert iar in dem ainvndohtzkistem iar ze Geiselhering daz dem pferrer Da was bei Gebhart von Sigenstein Eberhart der chastener Pvlacher Ratold vnd Dietmar alle fvmf des Schvngingers chneht Dietreich der Chazpech Fridreich Chvnrat Vlreich Rvdolf Rvdger Widenman Reicher Hertweich alle des Pullers chneht Friderich der Zolner vnd sein prvder der Nenczinger Fridrich vnd aber Fridrich zwen Pvsenchover Chvnrat vnd Perhtold zwen gebrvder von Pvhel der Amman von Haderspach vnd der chamerer der Chvrsener in der wis Vlreich avf dem Lins Heinrich der hofmaister ze Geiselhering Dietmar der Wallerinn chneht vnd ir reitter der Pledorfer Vlrich der Winter Gotfrid an dem marcht der pferrer her Eberhart von Hutte vnd sein mesener Heinrich der mair von Illenpach vnd der Stadeler Chvnrat der Fleishman vnd der Golsse Seibot vnd Heinrich zwen Poemel vnd noch vil mer di dapei warn ander levt