Charter Document - 04100074

Ich Vlrich der Speyser auz der Ernawe vergich an disem brief vnd tvn allen den chunt die den brief ansehent oder orent lesen daz ich einen hof datz Ebenhausen den ich vnd min bruder Heinrich chauften ze rehtem aigen von Chayshamern verchaufte han dem spital hincz Regenspurch mit allem dem daz darzvgehort besuchtes vnd vmbesuchtes gebowen vnd vngebowen ze dorfe ze velde ze holcze vnd ze wismade vmb eines vnd sehczich pfunt Regenspurger pfenninge vnd ich sol im auch dazselbe gut gestetigen versprechen vnd rehtvertigen als des landes reht ist swa oder an swiu ez dem vorgenantem spital ze chriech wirte vnd daruber han ich dem vorgeschriben spital ze Regenspurch die burgen geseczet die hinnach geschriben stent an dem brief vnd auch desselben veriehent als hernach geschriben stet Wir Friderich von Tanne Marquart Holczheimaer Eberhart von Erlach Seyfrit Wilant vnd Albreht Speyser veriehen auch an disem brief daz wir des vorgenanten Vlrich des Speysers burgen sein vmb die stetigunge des houes dacz Ebenhausen den er dem spital ze Regenspurch hat verchaufte daz wir im den vnuerscheidenlichen rehtuertigen svln vnd stetigen als des landes reht ist Vnd geben im darvber den brief ze einer vrchunde mit den Insigeln versigelt vnd geheln auch alle fvmfe an div driv insigel wan wir svmlich selber niht aygner insigel heten Der taidingen sint auch geziuge her Heinr[ich] der do verweser waz der pfarre ze Ingoltstat Leutwin der rihter Otte der mvnzmaister Chunr[ad] Pfeffel Vlr[ich] Wilde Heinr[ich] Percheimer Chunr[ad] Boytir vnd Chunr[ad] der Percheimer des Wilden aydem vnd ander bidewer leute vil Daz ist geschehen dacz Ingoltstat da von Christes geburde warn tausent jar zwaihundert jar vnd in dem sehsten vnd siwnczigistem jar an dem heiligem auferttag vnsers herren Jesu xpi