Charter Document - 04100058

Ulricus Dei gratia sancte Salzburgen[sis] ecclesie archiepiscopus apostolice sedis legatus universis ecclesiarum rectoribus ceteris qui Christi fidelibus ad quos presens littera pervenerit salutem in eo qui est salus omnium Quoniam ut ait apostolus omnes stabimus ante tribunal Christi recepturi prout gessimus in corpore sive bonum fuerit sive malum oportet nos diem messionis extreme operibus misericordie prevenire ac in terris eternorum intuitu seminare quod reddente Domino cum multiplicato fructu recolligere debeamus in celis firmam spem fiduciamque tenentes quoniam qui parce seminat parce et metet Et qui seminat in benedictionibus de benedictionibus et metet vitam eternam Cum igitur hospitale beate Katherine virginis situm in pede pontis Ratispon[ensis] ad opus pauperum et indigentiam infirmorum ibidem decumbencium auxilio Christi fidelium admodum indegeat nec sine illo tante negocium perficere valeat pietatis universitatem vestram monemus et hortamur in Domino atque in remissionem vobis iniungimus peccatorum quatenus de bonis vobis collatis a Deo pias ei elemosinas et grata caritatis subsidia erogetis ut per hec et alia bona que Domino inspirante feceritis ad eterne felicitatis possitis gaudia pervenire Nos enim de omnipotentis Dei et beatorum Ruperti et Virgilii confessorum eius confisi gratia omnibus vere penitentibus et confessis qui predicto hospitali manum porrexerint adiutricem quadraginta dies cr[i]aminalium iniuncte sibi penitencie et terciam partem venialium misericorditer relaxamus vobis ecclesiarum rectoribus quibuscumque per totam nostram provinciam constitutis in virtute sancte obedientie firmiter precipiendo mandantes quatenus nuncios eiusdem hospitalis cum pro requirendis elemosinis ad vos recursum habuerint studeatis ob nostri reverenciam efficaciter promovere nec de collectis ab eisdem vestrum aliquis ullam presumat penitus cellere porcionem exclusis per vos nichilominus in eorundem presencia sicut penam canonicam evitare volueritis questuarus ac petitoribus universis ad hec etiam illam predicto hospitali adicimus gratiam ut suffraganeorum nostrorum omnium indulgenciarum littere eidem concesse per totam nostram dyocesem admittantur Datum in Otinga XIII kal Maii anno domini millesimo CCLXII