Charter Document - 04100011

Gregorius episcopus servus servorum dei universis Christi fidelibus per Salzeburgen[sem] provinciam constitutis salutem et apostolicam benedictionem Quoniam ut ait apostolus omnes stabimus ante tribunal Christi recepturi prout in corpore gessimus sive bonum fuerit sive malum oportet nos diem messionis extreme misericordie operibus prevenire et eternorum intuitu seminare in terris quod reddente domino cum multiplicato fructu recolligere debeamus in celis firmam spem fiduciamque tenentes quoniam qui parce seminat parce et metet et qui seminat in benedictionibus de benedictionibus et metet vitam eternam Cum itaque sicut accepimus dilectis filiis [] magistro et fratribus hospitalis ecclesie sancte Catarine iuxta pontem Ratisponen[sem] ordinis sancti Augustini ad consumationem ipsius hospitalis et ecclesie ac domorum eorum que de novo construere inceperunt ac ad sustentationem pauperum et infirmorum quorum illuc non pauca confluit multitudo proprie non suppetant facultates universitatem vestram rogamus monemus et hortamur in domino in remissionem vobis peccaminum iniungentes quatinus de bonis a deo vobis collatis pias eisdem elemosinas et grata caritatis subsidia erogetis ut per subventionem vestram opus ipsum valeat consumari et vos per hec et alia bona que domino inspirante feceritis ad eterne possitis felicitatis gaudia pervenire Nos enim de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis qui ad dictum locum cum devotione accesserint vel de bonis sibi collatis a domino destinarint quadraginta dies de iniuncta sibi penitentia misericorditer relaxamus presentes autem mitti per questuarios firmiter inhibemus eas si secus actum fuerit carere viribus decernentes Datum Lateran III kalendas Maii pontificatus nostri anno duodecimo