Charter Document - 04090011
| Charter Number: | 04090011 |
|---|---|
| Cartulary Title: | Archiv Ceské koruny |
| Charter Language: | Latin |
| Charter Origin: | Papal |
| Charter Type(s): | Mandate |
| Date: | 1295 |
| Date type: | Internal, Papal |
| Resource Link(s): |
Monasterium.net |
Charter:
Bonifacius episcopus servus servorum dei dilectis filiis Stephano abbati et conventui monasterii in S Corona ordinis Cisterciensis Pragensis dioecesis salutem et apostolicam benedictionem Iustis petentium desideriis dignum est facile prebere assensum et vota que a rationis tramite non discordant effectu prosequente complere Ea propter dilecti in domino filii vestris iustis postulationibus grato concurrente assensu omnes libertates et immunitates a predecessoribus nostris Romanis pontificibus sive per privilegia vel alias indulgentias vobis et monasterio predicto concessas nec non libertates et exemptiones secularium exactionum a regibus et principibus vel aliis Christi fidelibus rationabiliter vobis et eidem monasterio vestro indultas ac monasterium predictum cum pertinentiis suis quod vos canonice proponitis adeptum et personas vestras ac locum in quo divino estis obsequio mancipati cum omnibus bonis que inpresentiarum rationabiliter possidetis aut in futurum iustis modis prestante domino poteritis adipisci sub beati Petri protectione suscipimus atque nostra specialiter autem decimas terras domos possessiones vineas grangias piscarias prata pascua nemora silvas hortos molendina et alia bona sicut ea iuste possidetis et quiete auctoritate vobis apostolica confirmamus et presentis scripti patrocinio communimus Nulli ergo omnino hominum liceat hanc paginam nostre confirmationis et commonitionis infringere vel ei ausu temerario contraire Si quis autem hoc attentare presumpserit indignationem omnipotentis dei et beatorum Petri et Pauli apostolorum eius se noverit incursurum Date Rome apud S Petrum xii Martii pontificatus nostri anno primo Scripta gratis Greorgius Steller