Charter Document - 04090003

Vestri honestas ordinis divitiis onusta virtutum et illibato commendabilis vite splendore diescens cuiusdam singularitate gratitudinis sic semper nostris comparuit speciosa conspectibus sic semper nostre micuit placida maiestati ut pre cuiuslibet alterius religionis habitu nostrum sibi devotum statuerit animum ac affectus nostros erexerit promptius ad retributionis mercedem proinde cupite sperandum non inargute argumento fidei colligentes quod suis non orphanatur devotio premiis quam erga illos quis gesserit quos [tituli] phalerant honestatis Et quidem ne velut otii gravidata sceleribus nostra infecunda delitesceret quodam torpore devotio quin potius ut exuberantioris mercedis premia mereremur ac ex remissionis indulgentia [note] delerentur peccaminum quas nobis de fragilitate carnis inscripserant motus sensualitatis illiciti per effectum operis manifestavimus devotionis affectum et vota ipsius ad partus invitavimus actionum Nam ob beate virginis honorem et sanctorum Bernhardi et Benedicti reverentiam claustrum vestri ordinis in regno nostro fundavimus ipsiusque largitionum nostrarum donariis collatas ampliavimus et ampliare intendimus facultates Quod quidem sicut fieri consuevit in cuiuslibet nove plantationis exordiis ut ab antiquioris claustri maturitate quasi cuiusdam novelle dependet propaginis surculus monasterio Sancte Crucis vestri ordinis etiam quod iacet [in] Austria duximus submittendum quatenus tenere magis etatis claustrum institutionibus senis informaretur emeriti et visitationis reformidans increpantis virgulam ad lineam [discipline] regularetur antique Sed quia fide qua nobis dudum tenebantur astricti nequiter in perfidiam permutata serenitatis austrum in austeri nothi nubila converterunt Australes et a loris nostri moderaminis se nimis procaciter quin potius infideliter eximentes colla sua iugo alterius dominii submiserunt sicque sue contra nos erexerunt proterve rebellionis calcaneum quod iam non sit tutum nobis ut illius patrie homines in regno nostro aliquid facere habeant assequantur honores vel dominio preferantur sed quod abbas de ipsa provincia in nostro instituatur monasterio vel potestatis alicuius preeminentia quisquam Australis in terris nostris debeat prerogari affectuose deposcimus quatenus nostrum quem erga ordinem vestrum gerimus zelum prudenter attendentes idem nostre fundationis monasterium alteri vestri ordinis monasterio in regno nostro locato videlicet in Plaz favorabiliter et ex speciali gratia submittatis facturi nobis rem gratam admodum et acceptam et affectum magne benivolentie ostensuri si nostrarum precum libamina tante devotionis ac rationis innixa presidiis optato dignabamini effectui mancipare precipue cum illud monasterium de Plaz cui submitti rogamus prefate fundationis nostre claustrum [de] vestri professione ordinis censeatur Nec illud a monasterio Sancte Crucis in Austria occasione malitie abbatis vel monachoram ipsius eximi petimus cum iidem abbas et monachi probitatis et discretionis dotibus redimantur sed quia intendimus universaliter eximere regnum in suis membris singulis a potestate vel dominio cuiuslibet Australis ne in ipso vel eius partibus Australis aliquis prerogetur Idcirco id duximus a vestra providentia non improbe postulandum scientes quod ab hoc de liberalitatis nostre munificentia prefata fundatio amplioribus proficiet incrementis alias autem quod non confidimus si vestra discretio exauditionis sue ianuam nobis tam iuste pulsantibus nollet ad nostrarum precum instantiam reserare scire de certo vos volumus quod proinde sedis apostolice que nostris non consuevit obsurdescere precibus impulsabimus clementiam vel sic aliter disponemus ut omnia nostra desideria compleantur