Charter Document - 04070001

Allen die disen brief sehent alt hoerrent lesen kvnden wir graue Rudolf von Habspurch vnt wir fro Elizabeth sin wirtenne dc her Rudolf von Beggenhouen her Ruedege von Werdegge vnt Wisse Wissen seligen svn von Zurich fur vns kamen vnt vns die vogetei die siv hatten ze lehen von vns fron Elizabethen der guetern ze Rapliswende dc einlef stuke giltet an dem Strike de sibenzehen stuke giltet dv gueter Walther Wisse bvwet an Gartenbuele dc einlef stuke giltet dc der Gepler het ze Hargarten dc acht stuke giltet dc der Rube bvwet dc in der parrochia ze Richtliswile lit de zwei stuke giltet dc der Schurman bvwet vnt ovch die vogetei die si hatten vber die lvte die dv selben gueter bvwent vnt vf dien selben guetern sizzent vf hant gegeben an vnser hende in allem dem rechte als siv die vogtei vber dv vorgenanden gueter vnd lvte hatten also hein wir die vogetei vf genomen von inen vnt durch ir bette so hans wirs verlvwen Herman Menidorf Rudolf Spichwart dem Guller Rudolf Snellen vnt Rudolf von dem Brunnen ze rechtem man lehen vnt in allem dem rechte als ovch siv die vogetei hatten also dc wir von dien lvten die vf dien guetern sizzent noch von ir nachkomen so siv nicht sint die vf dv gueter koment niemer dekein stvr geuorderen noch nemen svn die wil siv vf dien guetern sizzent vnt dc wir siv nicht besweren svn mit keinem dinge vnt dc ir lip vnt ir vamt gut sol lidig vnt fri sin wan ovch die vorgenanden her Rudolf von Beggenhouen her Ruedege von Werdegge vnt Wisse die vorgenanden vogtei der guetern vnt der lvten hatten in dem selben rechte Ovch het her Ruedege von Werdegge gelopt dc er der vogtei der guetern vnt der lvten wer sol sin gegen rechte als da vorgeschriben ist swa alt swenne die sin bedurfen dien wirs nv verlvwen han Vnt ze einem offennen vrkvnde alles so da vorgeschriben ist geben wir disen brief vnt ovch der von Werdegge besigelt mit vnsern ingesigeln offenliche Diz geschach vnt wart ovch dirre brief gegeben Zurich in der stuben des huses Johans Wolfleipschen do von gottes geburt waren zwelfhundert vnt nvnzeg jar vnt dar nach in dem nvnden jare an dem nechsten mentag vor mitter vasten Vnt meister Volr Wolfleipsch chorher Zurich her Rud chilcherre von Ettiswile her Hug von Landenberch ritter Johans Wolfleipsch Chvonr der truchsez von Einsidellen her Albrecht ritter von Vrinchon Rud Twingenstein Rud ab dem Turn Heinr vs der Owe Berchtolt von Bossinchon vnt ander vilgezugen Ich her Ruedege ritter von Werdegge der vorgenande vergich an disem briue swc da vorgeschriben ist dc dc war ist vnt geschehen ist als da vorgeschriben stat Vnt ze einem offennen vrkvnde henk ich min ingesigel an disen brief an dem tage der vorgeschriben jarzal