Charter Document - 04061251

Allen glovbigen luten die disen brief sehent swester Mehth dv masterin der swestern des conuentes in Witengassen erkantnist dirre nah gescribner dinge Das man der dinge iht vergesse die in der zit geschehent so ist es nohtturftig das man su mitte brieuen bestetege Dar umbe so wissin alle die nu sint alde har nach koment dc herre Cvonrat der phruendener ze sante Oswaldes capelle ze sante Gallen dur siner sele hau willen ainen wingarten lit ze Vberlingen den er reht vnd redelich kovfte mit sinem guot het ledecliche vnd aigenlich gegeben vnsern swestern von dem vorgenanten conuent also swenne der vorgenant herre Cvonrat stirbet so sol vnser conuent ze sinem iargezit iemerme ainen aimer guetes vnd luters wines geben den gaistlichen Minren bruodern ze Costenze die dc iargezit sun began schonn vnd lobelich vnd ze sante Francissen tage och ain aimer wines allu iar nach sinem tode Disv ding sint geschehen in dem dein stubelin vnsers garten do man zalte von gottes geburte zwelf hundert iar vnd sibin vnd hahzig iar an dem nehsten tage vor sant Peters tage dc er ze stuole wart gesezet Vnd an disen dingen waren gezvge her Jacob von Rogwil Hainrich von Tetincouen Volrich der amman der stette ze Costenze Vol Vbelin vnd anderre vil biderber lute Vnd dc disu ordenunge dirre dinge als hie vor gescriben stat veste vnd stete belibe so habe ich die vorgenante swester Mehth du maisterin des conuentes mit hern Cvonr des vorgenante priesters willen vnd rahte vnd ovch mit der gehellunge vnd mit dem willen vnserre swestern von dem conuente allersament gemailich erworben disen brief bisigelte mit dem ingesigel des conuentes der Minren brueder von Costenze vnd mit dem ingesigel vnsers conuentes Vnd sol och dv maisterin den swestern von dem vorgenanten convente ze dem selben iargezit ain halben aimer des selben wines geben