Charter Document - 04060437

Wir uon gottis ginaden abte Wilh unde der conuent des gotzhuses ze sante Gallin kunden allen den die dizen brieue lesint oder hoerrint lesin ain warhait aller der ding so hie nah gischribin stat Won mencilicher sin von krenki der nature bloede ist vnde virgessilich dauon so ist ez nuz vnde erber dc man ez bihalt mit brieuin swas ewiger kraft bidarf vnde staet bilibin sol Vnde darumbe so sont ir wissin alle vur war dc wir an sahin den nuz vnsers gotzhuses mit guotim rat den wir daruber hattin vnde erlobtin vron Annin Bilgris wirtennun des altin aenis burgers von Zurich vnde ir kindin die vns unde vnsir gotzhuse anhoerrint dc su den kelnhoue ze Rutsswile der ir vries aegin was mit vnserm gunst virkoftint den erberin vrowin in got der [] priolinn vnde den vrowin an des gotzhuses stat ze Doesse vnde viriehint offinlich an dizem brieue dc wir dc virhengt vnde gevrlobt habin mit wortin mit werch mit allem dem reht so darzu hoert Och so hant die selbin vrowin ain phunt wahs sante Galler gewaegs gisecit vnserm gotzhuse dc su vns des allu jar werin sont an sante Gallin tult vnde in vnser stat ze sante Gallin Wir gihaessin och dc wir mit kaener slaht ding hie wider tuent vnde oncihint vns och aller der brieue die wir von Rom alt ander swa hettin oder gewinnin moehtin vnde gimellicher oder sunderlich vngewonhet oder dc es ubil vnde mit schalkait darzu sie braht vnde gemaelich vnde och sunderlich alles des rehtis damit ir kaenis so dauor gischribin stat geierrit moehti werdin Vnde darumbe so gebin wir den vorgenamtin vrowin von Toesse dizen brieue bisigiltin mit vnserin ingisigiln Dirre brieue wart gigebin ze sante Gallin do von gottis giburt warint zwelfhundert vnde nun vnde nuncig jar ind der XII do ze gegin warin her Walt Lesti her Bur der vogt von Wartinse C der statamman vnde ander biderbir lut genuog Diz gischah IIII idus febr