Charter Document - 04060418

Wir graue R von Habspurg vnd herre ze Rapreswile vnd wir Elizabet grevin von Habspurg vnd frovwa ze Rapreswile kvnden allen den de disen bref sehent ald horrent lesen das Peter von Ranbach vnser leiber burger von Rapreswile sin kamer len in dem hove ze Obrendvnrten ein malter habren geiz ierlichs das von vns der herschaft von Rapreswile sin rect kamer len was verkovfet hat rect vnd redlich den erberen heren [] dem abte vnd dem gozhus ze Rvti vmb sech phvnt phenningen Zvrier der sv in gewert hant vnd hat das verkovfet in allem dem recte gegen nvzze als ovch ers hatte vnd nos vnd von alter dar bracht wart Vnd wand Peter dasselbe len ane vnser der herschaft von Rapreswile hant gvnst vnd willen nvt mocte entfromden noch verkovfen so bat er vns flelich das wir im das gondin ze verkovfenne dur sin notdurft vnd es von im vfnemin vnd das selbe len gebin ze rectem eigen den vorgenanden heren von Rvti vnd ovch das mit vnseren breven vndingesiglen bestetin Das selbe len namen wir ze siner bette vf vnd gaben das vnd gebens ovch an disem breve vnd swas rectvnge wir dar an hatten ald mocten gen frilich vnd lideklich dur vnsers heiles willen dem [] abte vnd dem vorgenandem gozhuse ze Rvti ze rectem frien vnd lidigem eigen den wir dv herschaft von Rapreswile ovch ze rectem eigen friem vnd lidigem geben hein vnd mit vnseren breven bestet den hof ze Obrendvnrten mit allem recte so dar zov horret dar in dis selbv kamer len horret Vnd veriehen dis alles an disem breve vnd das es beschehen ist mit vnser hant willen vnd gvnst vnd wer das sv dar an eiman wolte beswerren an geistlihem ald an weltlihem gericte so sol sv Peter verstan mit siner kost vnd erbeit swa vnd swenne das beschicht vnd sus bedurfen er entzieht sich ovch aller ansprahe de er eimer mocte gewnnen vmb dis govt an geriete ald ane geriete Vnd das dis bi vns vnd Peter stet belibe mit govter trvwe an allen var so geben wir ze Peters bette den vorgenanden heren disen bref besigelt offenlich mit vnser beider ingesigel vnd besteten swas he geschriben stat Dis beschac ze Rapreswile do ze gegen waren dise gezuge der kilkenherro von Jonen H ab dem Turne R von Kloten H ab Ebnode Hvg Brvno Hvg Manesse H Boni H Primli R von Grovnowa vnd H der Armo do von gottes geburte waren zwelfhvndert acht vnd nvnzig iar an dem zistage ze mittem ovgsten