Charter Document - 04060404

Wir Wilhelm von gottes genaden abt des gotzhus von sant Gallen kundent allen den die disen brief iemer angesechend ald hoerend lesen dz fur vns komend die fromen ersamen lut Rudolf von Langenhart den rehten namen dem man nu sprichet Rudolf Balg von Gerswile vnd fru Beat von Wertach sin elichu wirten die vnser vnd vnsers gotzhus ze sant Gallen erbern getrwen dienstlut sint von allen iren vordran dz vns kunt vnd vissend ist ir sont alle wisen fur wars dz wir an habind gesehen die grossen trw vnd den biderben dienst den vns vnd vnserm gotzhus Rudolf von Langenhart dike vntz her het getan vnd noch tun mag vnd vmb sinen getrwen dienst vnd durch siner bett willen so lichen vnd geben wir im vnd frwv Beaten sine elicher wirtenn vnd allen den kinden du von inan iemer geboren werdent ald geboren sint vnd iran kinden kinden vnd allen iran nachkomen friges burger reht in vnser stat ze sant Gallen mit aller der frighait vnd den rehten so mit den selben Worten begriffen vnd beslossen also dz su dz selb burger reht vnd vnser gab die wir inan tuegind fur vns vnd vnser nachkomen haben in allem dem reht alz es ander lut hand die von alter friges burgerreht hand gehept in der stat sant Gallen vnd von reht vnd von gewonhait haben sond vnd dar vmb dz den vor genanten Rudolfen vnd frvo Beaten vnd allu du kind die von inan iemer geboren werdent oder geboren sint es sigint toehtran oder knaben wa su sint vff dem land ald in den stetten von vns noch von vnsern nachkomen noch von nieman andern von vns noch von vnsers gotzhus wegen an dem selben burgerreht niemer werden beswaert noch bekrent an ira tod noch vor iren tod weder mit geriht noch an geriht dz habin wir inan gelobt mit vnser hand fur vns vnd vnser nachkomen vnd habint ovch fur vns vnd all vnser nachkomen die gnade vnd du reht inan frilich vnd willenklich geben vnd getan also dz su dz selbe burgerreht gen vns noch gen vnsern nachkomen niemer mugent verlieren mit en kainen dingen vnd sunderlich weder mit wiben noch mit mannen noch mit ain kainen andren sachen su sigint benempt ald vnbenempt wan dz su vnd allu ira kint vnd ira kint kint vnd all ira nachkomen iemer me in der frighait beliben sont als vor beschriben stat an disem brief Waer ovch aber dz ieman vnd sunderlich von vns ald von vnserm gotzhus wegen kainer schlat reht ald vordrung woltin han an ira lib ald an ira gut denn hie vor geschriben stat des sont su vnd ira erben sin vnd werden mit disem brief ledig vnd los vnd vnhaft an allen gerihten an gaistlich an weltlich es sig vff dem land ald in den stetten wa ald wie es ze schulden kumt ald su es bedurfent Vnd des ze warem vnd offem vrkund vnd guter vnd gantzer sicherhaid alles des von vns geschriben stat an disem brief geben wir vor genant abt Wilhelm den vor genanten Rudolfen von Langenhart den man nempt Rudolf der Balg von Gerswile vnd frvo Beaten von Wertach siner elichen wirtenn vnd allen den kinden du iemer von inan geborn werdent oder geboren sint vnd ira kinds kinden vnd allen ira nach komen fur vns vnd all vnser nachkomen vnser insigel an disen brief Der geben ist ze sant Gallen in vnserm hoff in dem jare do man zalt von Cristes geburt zwoelfhundert nuntzig jar in dem sibenden jar an dem zinstag vor sant Jacobs tag des zwelfbotten