Charter Document - 04060390

In dem namun unsurs herrun amen Kunde ich her Eberhart uon Burgulon allen dien die disun brief sehunt aldur horrunt lesunt das ich gegebun han ze choufunne die hube des Hagunstalers die hube des Hofsteters die hube des Brunun ze Lomes in dem dorf der abtissunnun unde dem conuent ze Tennincon umbe uunhzug marc unde sesh marc minra IX ß Ich han die drie uor genantun huban dien uor genanten frovwon gerihtut uon minum herrun grauun Friderich uon Toggunburg mit allem rehte ze einum frigun eigun Were abur das ieman dien uor genanten frovwon die uorgenantun huban an spreche da sol ich unde minu kint ir wer sin nah rehte des chovfus unde der rihtunge unde der hubon Das dis ein warheit si unde stete bulibe des ist gezug her Johannes uon Sconunberg her Friderich uon Winfeldun der meiur uon Lochnowe her Cunraht uon Hermstorf her C der lupriestur ze Bichulnse was unde dirre brief gegunwrtic busigultur mit minum insigul Dirre brief wart gegebun nah gotus geburte ubur tusunt jar zweihundurt jar nunzug unde sesh jar Barbare