Charter Document - 04060389
| Charter Number: | 04060389 |
|---|---|
| Cartulary Title: | Chartularium Sangallense IV [St. Gallen] |
| Charter Language: | German |
| Charter Origin: | Lay |
| Charter Type(s): | Promise |
| Date: | 1296 |
| Date type: | Internal, Feast |
| Resource Link(s): |
Monasterium.net |
Charter:
Allen den die dizen brieue lesint oder horrint lesin kunden wir Eglolf der alte Rud vnde Eglolf der jung sine bruoder ginampte von Rosinberg ain warhat dirre dinge so hie nah gischribin state Ir sont alle wissen dc wir dc viriehin an dizem brieue dc wir du sibin phunden geltis du vs vnser herre von gottis ginaden abte Wilhelm von sante Gallen het gusezit usser sinen cinsen in dem ampte ze Tufen ze henne vnde ze niessinne vnz dc er us giwert trier marchen geltis oder vunf vnde trisig march silbers Swenne er oder kaener siner nahkomen vns alde vnser erbin ze ainer losung des selbin phandis gewert trier march geltis oder vunf vnde trisig march silbers so sol dc selbe phant von vns ledig sin Och binden wir vns dc wir ime denne die brieue wider gebin die er vns vmbe dc selbe phant het gigebin Vnde dc dc war si so gebin wir Eglolf der alte vnde Rud an vnser vnde vnsers bruder statte Eglolfs des jungen dem vorgenampten vnserm herrin dem abbte vnde dem capitel ze sante Gallen dizen brieue mitte vnser zwair ingisigil bisigilten Dirre brieue wart gigebin do von gottis giburte warint tusint zwse hundert vnde sehs vnde nuncig iar an dem vierdin tag nah ingaendem maeien