Charter Document - 04060380

In gottes namen Ir sond alle wissen die disen briefe ansechint oder hoerint lesin dz wir von gottes gnaden abbte Wilhelm ze sant Gallen kunden vnd vergechen offennlichen an disem briefe das wir mit gantzem rat vnd willen des cappittels vnsers gotzhuses von sant Gallen vnnser hoeue ze Wyler vnd ze Schategge mit allem dem vnd dartzu hoerrit vnd darin hoerrit kirchensatz vnd gesuchtz vnd vngesuchtz vnnserm lieben vettern grauen von Bregentz rechte vnd redlich mit allem rechte on alle geuaerde vmbe funfftzig march silbers Costentzer gewaege haben versetzt der wir bedorfften ze noete vnnsers gotzhuse vnd habin im die vorgenampten hoeue also gesetzitt das er su niessen sol in allem dem rechte als wir vnd vnser gotzhusen su daher genossen haben ovn all geuaerde an du closter lehen die vsse den houen gan du hoerint vns nit an vnd vergechen och des offennlich an disem briefe das wir noch vnnser gotzhuse noch vnnser nachkomen der vorbenanten hoeue vnd das darin vnd dartzu horett an du closterlehen du daruß gand enhainen gewalt ze loesin sont han von nun ze mayen ze der hailigen dult Gordiani vnd Epymach vber zwoelff jar vnd so die zwoelff jar hin werdint wenn wir oder vnser gotzhus abt vnnser nachkomen loesen moegent oder wellent vmb vnnsern vetter ald vmbe sin erben die vorgenanten hoeue vmb funfftzig march silbers so sol man sy vns vnd vnnserm gotzhus ledig vnd los Ion vnd vergechin och des offennlich das die vorgenanten hoeue ledig vnd lovß son sin von allermenglichz an du closterlehen Vnd das dis war vnd staett belibe als da vor geschriben stavt des geben wir abbte Wilhelm vnser insigel an disem briefe vnd das cappittel sin insigel ze ainem waren vrkund Vnd sint des gezuge grauff Wilhelme grauff Huges sun von Montfort vnd her Rudolff von Roschach der kirchherre vnd der schultheisse von Wil vnd Cunrat der aman von sant Gallin vnd Otto von Anwiler vnd Wernher von Lochen vnd Rudolff von Lochen Ich graue Huge von Pregentz der vorgenant vergiche och fur mich vnd alle min erben alles des dauor geschriben stavt Vnd des ze ainem waren vrkunde so gib ich minem heren dem abbte vnd dem cappittel ze sant Gallen disen briefe mit minem ingesigil gesigilt Vnd geschach dis ze sant Gallen ze ingaendem mertzen do man zalt von gottes geburte zwelff hundert javr vnd in dem sechstin vnd []