Charter Document - 04060377
| Charter Number: | 04060377 |
|---|---|
| Cartulary Title: | Chartularium Sangallense IV [St. Gallen] |
| Charter Language: | German |
| Charter Origin: | Lay |
| Charter Type(s): | Surrender |
| Date: | 1295 |
| Date type: | Internal, A.D., Feast |
| Resource Link(s): |
Monasterium.net |
Charter:
In gotis namen amen Wir her Volrich vnd her Walther die gebrveder von Lovwemberch kvnden allen den die disen brief sehint ald horent lesen dc wir lvterlich dvrh got vnd dvrh erber lvte bette haben Heinrich Vuhslin erlovbet dc er sich hat bigebin vnd dc er sich hat gemachet vnd ingetan ze Diessinhovin in der vrovwen closter vnd entziehin vns alles des rehtes des wir an dem selbin Heinrich Vuhslin hatton wan er vnser waz alle die wile vntz er ein bigebin man ist Wer ovch dc dc er wider leige wurde da vor got si so ist er abir vnsir als er ovch e was Daz diz war si vnd stete belibe dar vmbe so henken wir die vorgenanden her Volrich vnd her Walther von Lovwemberch vnserv insigel an disen geginwurtigen brief Dis bischah vnd wart dierre brief gigebin nah vnsers herren gebvrte Jesu Christi zwelfhvndert iar nvnzich iar vnd dar nah in dem sehsten iare an dem nehisten vritage nah der chindelin tage in der stat ze Swarzimbach Wir virgehen ovch daz der selbe Vuhsli niemannes was wani vnsir zweiger