Charter Document - 04060375

Ich Elisabet dv grevin von Honberg vnd vrovwe von Raprechswile kvnde allen die disen brief sehent alder horent lesen daz ich dien ewirdigen herren dem abte vnd dem convent von Wetchingen schvldig was XXX march silbirs vnd wand ich bars silbirs nich inhatte da mit ich in virgulte do saste ich in mit mines vogtis hant hern Hermans von Boinstetten des eltirn der mir mit vrteilde vber dise sahke wart zi vogte gigeben vnd mit Wernhers mines svns hant dien vorgenanden herren von Wetchingen zi phande minen hof zi Wangen vnd mine swege zi Wege dc si von dien beiden gvten an korne vnd an mvlken ierlich nemen fvnf march wert vnz si ir silbirs gar vnd vollekliche giwert werden Den ersten cinz den die vorgescriben herren von Wetchingen svllint nemin den svn si nemin von sante Martines mes dc nv kvmet vber ein jar Das aber dis stete bilibe dar vmbe han ich disen brief bisigilt mit minen ingesigele vnd mit Hermans von Boinstetten den ich vber dise sazzvnge hatte zi vogte ginomin Dis gischah zi Otinbach an sante Marien Magdale nvn abinde do von gottes gibvrt warin zwelf hvndirt iar vnd fvnf vnd nvnzig jar Die gizvge die dis sahen vnd horten dc sint der abt von Wetcingen vnd brvoder Heinrich von Rordorf vnd brvoder Berchtol von Schafhvsen vnd her Rvodiger von Werdegge her Jacob der schvltheise vnd her Rvo von Bechinhoven ritere Jo Wolfleibhz Herman hern Vrideboldes svn von Schafhvsen Arndt des svn ab dem Tvrne Vischeli