Charter Document - 04060368

Allen den die disen brief sehent older horent lesen kvnden wir Elizabeth graven Ludewiges seligen wirti von Homberg vnd vrowe ze Raprehtzwile das wir hern Chvnrate dem Wizsen kor herren ze Zvrich Wizzen sines brvoder seligen svne verkovfet han vnd verkovfen mit disem briefe fur reht lidig eigen ane zwei fvnzig stucke gulte an mvlchen vnd an korne in dem banne vnd der barrochie ze Vfnowe vnd zwei stucke in der barrochie ze Rihteliswile vnd sint das dv gueter dv hie nah geschriben stant Rapliswende das gut fur einlvf stucke gulte an dem Stricke das gut fur sehzen stucke gulte vnd an Bleichen zwei stucke gulte vnd buwet disv gueter Walther der Wizze an Garten buele einlvf stucke das der Gepler hat ze Hargarten aht stucke da der Rube vf sitzet in der barrochie ze Rihteliswile zewei stucke da der Schurman vf sitzet vnd hat vnd hein ime vnd sines brvoder svne disv vorgenanten gueter gegeben vor rehtem gerihte mit vnsers vogtes hant graven Huges von Werdenberg vnsers brvoder den wir vor gerihte ze rehtem vogte genomen haben vnd mit vnser kinde hant Wernhers Rudolf Ludwiges Cylivn vnd Clarvn vmb ahzig march lotiges silbers der gewiht von Zvrich vnd veriehen das wir das silber von ime enphangen han vnd vns mit von Juden vnd von giseln erlost han da wir schedelich stvonden vnd hein ime disv vorgenanten gueter gegeben mit wnne mit weide mit holze mit velde mit vsgelende gebuwen vnd vngebuwen mit wazzer vnd mit wazzer wegen vnd mit aller ehafti vnd mit allem dem rehte so ze den vorgenanten guetern von alter har ie gehorte Ouch han wir inen gegeben vnd geben mit disem briefe ze varnde vnd ze niessende den luten die das gut buwent gemeinsami holz velt wnne vnd weide vf vnser vogteje swa dv da lit vnd mit namen in dem hof ze Wolrowe vnd han vns der selben gueter enzigen vnd vf gegeben in sin hant vnd sines brvoder svns ze niessende vnd ze hande in allem dem rehte als da vorgeschriben stat vnd setzen si in gewalt vnd in gewer der vorgeschribenen gutern Dar zvo han wir inen vnd dem von Werdegge vnd dem von Bechenhoven mit vnsers vorgenanten vogtes hant graven Huges vnd mit vnser vorgeschribenen kinde hende gelihen die vogteie vber dv vorgenanten guter vnd vber die lute wib vnd kint die da vffe sitzent ze rehtem lene also das wir die selben lute vf dem guete niemer besweren sullen mit dekeiner slahte dinge es were danne so vil swa si ander gut hant ane disv gueter vnder vnser vogteie dv gueter sullen wir sturen als wir wenen reht tvon ir lib vnd ir varndes gut sol lidig vnd vri sin wer aber das die lute die nv vf den guetern sittzent sturben older verdurben swen si danne vf das gut setzent vnser luten mit vnserm willen die lazsen wir inen in dem selben rehte vnd in der vriheit als die e drvffe sazsen ze rehtem lene vnd loben inen vnd ir erben dem von Werdegge vnd dem von Bechenhoven fur vns vnd fur vnser erben disen kovf stete ze hande mit guten trvwen ane geverde das eigen fur reht eigen die vogteie ze rehtem lene ze niessende vnd ze hande mit twinge vnd mit banne vnd binde darzvo vns vnd vnser erben disen kovf vnd alles das da vorgeschriben stat stete ze hande vnd niemer da wider ze tvende mit worten noch mit werchen mit vns noch mit niemanne anderer vnd geloben fur vns vnd fur vnser erben dis gutes reht wer ze sinde an geislichem vnd an weltlichem gerihte swa er older sin erben sin bedurfen des eigens fur eigen der vogteie fur len vnd verzihen wir vns alles des rehtes so wir older vnser erben an das gut hatton vnd aller der rehtvnge der keiser older der bebeste dv geschriben sint older noch geschriben werdent da mit wir disv gvoter mohten wider gevordern older disen kovf en dekeinen weg geirren Vnd zeinem steten vnd ewigen vrkvnde aller der dinge so da vorgeschoben stant so geben wir inen disen brief mit vnserm vnd vnsers vogtes graven Huges von Werdenberg ingesigeln besigelt offenliche Wir grave Hug von Werdenberg wand wir sagen das dirre kovf vnser swester vnd ir kinden besser was getan danne vermitten vnd ir vnd ir kinden nvtze vnd gut was so gehillen wir des kovfen vnd bestetgoten mit vnser hant vnd zeinem vrkvnde aller der vorgenanten dingen so henchen wir vnser ingesigel an disen brief Dis geschach zer Nvwen Raprehtzwile in dem jare do von gotz geburt waren zwelfhvndert in dem fuf vnd nvnzigostem jare an dem vritage nah sant Scolastigen tage da zegegin was her Herman vnd her Hug von Landenberg her Rudeger von Werdeg vnd her Johans von Esche D der meier von Windegge her Cunrat von Slatte her Burchart vnd her Heinrich in dem Tvrne ritter Johans vnser schriber Bartholomeus von Jone Albreht von Ruti vnd Cvnrat von Vrinkon vnd ander erber lute gnvege