Charter Document - 04060360
| Charter Number: | 04060360 |
|---|---|
| Cartulary Title: | Chartularium Sangallense IV [St. Gallen] |
| Charter Language: | German |
| Charter Origin: | Lay |
| Charter Type(s): | Surrender |
| Date: | 1294 |
| Date type: | Internal, A.D., Feast |
| Resource Link(s): |
Monasterium.net |
Charter:
Allen den die disen brief an sehent oder hoerent lesen kvnde ich Willehalm ain ritter von Staina daz der maister vnde die phleger des spitals des hailigen gaistis ze Kostenze kovfton vmbe Johannesen den Hvober minen man der min aigen ist ain gvoteli daz lit ze Pettenanch in Hoeri bi des spitals gvot vmbe zwai phvnt vnde sehs schillinge Kostinzer phenninge vnde giltet daz gvoteli zwene mvtte habirn vnde ainen halben mvtte kernin zwai iar vnde daz dritte iar giltet ez nivt vnde ist reht aigen dierre kovf geschach mit minem willen vnde mit miner hant rehte vnde redelichen ane alle gevaerde vnde gap inens vf an der dvrfigen stat mit allem rehte vnde mit Johannese minem man vnde daz ez ovch staete belibe dem vorgenanden spitale vnde den dvrftigen von mir dem vor genanden Willehalme von Staina vnde minem man Johannesen vnde von allen vnseren erben dar vmbe hiez ich in disen brief schriben vnde henche min insigel dar an ze ainem vrkvnde vnde vestenvnge ainer ganzen warhait Diz geschach vnde wart dierre brief geben ze Kostinze an dem ersten dvnrestage in dem maien do man zalte von gottes gebvrte zwelf hvndirt jare vnde nivnzic vnde in dem vierden jare