Charter Document - 04060358

Allen die disen brief sehent ald hoerent lesen nu ald har nach kunden wir Elsabeta du grevin von Raprechtswiler graven Ludwiges seligen wirtinne von Honberg dc Rudolf von Hofstetten amman von Walastade sin gut dc da heizet du Owa bi Wrmspach dar an stoset der vrowon gut von Wrmspach dc da heiset Schorenbuel sunnenhalb vnd anderthalb des vorgenanden Rudolfes hof abendes halb das er von vns vnd von vnseren vorderen ze rechtem lene hatte mit vnserm vnt vnser kinde vnd vnsers vogtz graven Hugs von Werdenberg willen vnt gunst dien geistlichen vrowon der ebtischinnun vnt dem conuent von Wrmspach des ordines von Citels in Kostencer bistom an ir vnd an des selben gotzhus stat von Wrmspach mit allem rechte mit wasser mit holze mit velde mit wisen mit achern mit wnne mit weide mit gethwinge mit banne mit aller ehaftigi vnd mit allem dem rechte so dar zu hoeret rechte vnd redliche mit aller der gwarsami vnd mit aller der ortvrumunge so nach rechte ald nach gewonheit noturfdig ist an susgetanen koefen vrkovft het vmbe zwo vnd drissig march loetigiz silbers Zuricher gewicht vnd dc er dc selbe silber emphangen het alleklich vnd im selbun angeleit het nuzberliche vnd dc die vorgenanden vrowe an ir vnd an des gotzhus stat von Wrmspach dc selbe gut von vnser hant nach des selben vfgebunge Rudolfes des ammans emphangen hant und in ir gewalt gezogen hant nach rechte vnd nach des landes sitte vnde gewonheit eigenlich vrilich vnd evklich ze bisizen iemer me Ovch het der selbe amman gelobt dien vor genanden vrowon vur sich vnd vur alle sin nachomen das er des selben gutz wer sol sin an geistlichem vnd an weltlichem gerichte vnd an allen tegdinge swa su sin budurfen Vnt dc dis alles war si vnd stete vnd veste belibe so heinken wir Elsabeta du vorgenande greuin wir grave Hug von Werdenberg vnt ich der vorgenande amman vnser ingesigel an disen brief ze einem ewigen vrkunde Dis beschach do von gotz geburt waren zwelfhundert vnd nunzeg vnd vier iar vnd dar nach in dem vierden iare ze sant Jacobs tult da ze gegeni ware der namen hie nach geschoben sint her Heinrich der Marschal von Raprechtswile her Churat der Truchseze her Jacob der Schultheis von Raprechtswile her Peter von Ranbach her Volrich von Ranbach her Rudolf von Hasle vnt her Johans Gamlunstein vnd ander biderbe lute genuge Dis wart vol fueret an sant Michels tage ze Zurich in der stat des selben iars do indictio was du actoda