Charter Document - 04060357

In gotes namen amen Wir Friderich vnde Swiker die gebrudere de Tumben von Niwenburch kunden allen den dise gegenwrtigen hantvesti iemer ane gesehent alde hoerint lesin aine gelovbsami allir der dinge so dar ane geschriben stat Ir sulent allesamint wissen fur war das wir baidesamint offenlichen veriehen mit dierre hantvesti das wir mit der burch ze Husen noch mit dem bovngarten noch mit dem winegarten so vnser herre abbet Will[ehel]m vmbe die von Husen kovfte wan das vns der selbe tail stat vmbe viunfe vnde zwainzig marche Vnde den selben tail der burch ze Husen den bovngarten vnde den winegarten vnde swas vnser herre der abbet Will[ehel]m vmbe Hvser kovfte den geloben wir vnsirme herren abbet Will[ehel]me vnde allen sinen nachkomen geben ze loesenne mit gvoten triwen vmbe viunfe vnde zwainzig marche vnde das wir vnserme herren dem vorgenanten abbet Will[ehelm]e vnde allen sinen nachkomen allis das staete haben das an dierre hantvesti geschriben stat dar vmbe so geben wir ime vnde sinen nachkomen allensamnit dise hantvesti zainime staeten vnde ewigen vrkunde besigelt mit vnser baider isigel Disiv hantvesti wart gegeben ze sante Gallin do man zalte von gotes geburte MCCLXXXXIIII jare an dem iungesten tage ovgesten da ze gegene waren herre Rud von Rorschach vnde R sin bruder von Rosenburch H dir maiger von Obernberch Otto von Ainewiller C der Kuchimaister vnde ich maistir Bertolt der schriber vnde ander erbaere livte genvoge