Charter Document - 04060351

Allen die disen brief sehent ald hoerent lesen kvnden wir vro Elizabeth greuenne von Raprechtswile graven Lodewiges seligen von Honberch vrowe dc wir mit rechter vrteilt vmb dis nachgeschriben sache graven Friderich von Toggenburch den eltern ze voget namen vnd dc wir enteil vnser noth die wir han von gvlte vberwinden moechten so han wir mit siner hant gvnst vnd willen verchovfet den hof ze Volkiswile die schvopossen ze Volkiswile vnd die schvopossen ze Ciminchon die da geltent sechs vnd zwenzeg stvke die vns eigenlich an horten vron Katherinen hern Hermans des jungern von Landenberch ritters vrowe vmb fvnf vnd vierzeg march silbers Zurich gewicht vnd sin ovch des gewert alleklich vnd hein wir vnd vnser kint dv vorgenanden guter vf gegeben mit allem dem rechte vnd mit aller der ehafti als wirs hatten an vron Katherinen hant der vorgenanden mit vnsers vogetes hant vnd enziehen wir vnd vnser kint vns aller der ansprach so wir iemer gehan moechten an dv vorgenanden gueter vnd loben vnd binden vns vnd vnser nachomen dc wir vron Katherinen der vorgenanden vnd ir erben vnd ir nachomen wer sien der gueter fvr lidig eigen an allen gerichten geistlichen vnd weltlichen swa ald swenne si es bedurfen Vnd ze einem offennem vrkvnt alles so da vorgeschriben stat geben wir vron Katherinen vnd ir erben disen brief besigelt mit vnserem vnd graven Friderichs ingesigeln offenlich Dir brief wart gegeben Zurich an sant Agnesen tag do von gottes geburt waren zwelfhundert jar in dem vierden vnd nvnzegostem jare Wir grave Friderich von Toggenburch der vorgenande ze einem offennem vrkvnt alles so da vorgeschriben stat henken vnser ingesigel an disen brief offenliche