Charter Document - 04060348

Ich Jacob der schvlthetze von Raprechtswile kvnde allen dien die disen brief sehent olde horent lesen das die vogetege die ich ze len han von sant Gallen in dem hofe ze Vnderbach mit allem dem rechte so sv mich an chomen ist minem herren dem abte vnd sinem conuent ze Rvti verkovfet han vmbe drie march silbers vnd ein phvnt Zvricher der sv mich gewert hant alse ich an disem brief vergihe Vnd han die selbvn vogeteie ze rehtem lene verlvwen ir gotshvs lvten vnd binde mich vnd alle min nahchomen das wir die selbvn vogeteie alwege lien svn vbe es ze schvlden kome ane widerrede vnd ane allen schaden ir lvten oder sweme sv si lien heisent Vnd sol dis iemer stete belibe vnsert halp es si denne das min herren der abt vnd der conuent von Rvti erwerben mvgen ze sant Gallen das man das len inen lihe so sol ich vnd min erben das selbe len vf geben ane ir koste vnd svn sv es enphahen vnd dannan hin han von sant Gallen Dis geschach in dem dorfe ze Oberndvnrethon do nah gotes gebvrte waren zvwelfhvndert iar viere vnd nvntzig iar do geschah es da ze gegen waren her Volrich der kilicherre von Walde her Dietheln von Windegga Wernher von Rambach Rvodolf von Hasle Dietrich Hegenli bvrgerre von Raprechtswile Heinr Stovri Rvodolf der aman von Grvninge vnd ander erber lvte Ind[i]c[ti]o[n]e VII