Charter Document - 04060347

Wir Elizabet greuin von Hovnberg vnd frovwa von Raprecht[swile] kvnden allen de disen bref sehent oder horent lesen das Johannes von Wagen vnd swester Geri sin swester vnser burger von Raprecht[swile] vmb ir erbteil den si an in vordrot leblich vnd minneklich vberein sint komen das er ir ierlich geben sol fvnf schefol govtes kernen vor sant Martis mes de wil so si lebet vnd sol ovch ir geben acht phvnt phenningen zwe phvnt ze sant Martis mes des nesten dar nach ze wenach ovch zwe phunt vnd ze iare ze den selben tagen dv andren veirv Vnd das er das verricte ze den ziten als ers gelopt hat so hat er ir geben dise gisele C den Banwart von Raprecht[swile] R den amman von Grevningen vnd B von Wagen de hant ir gelopt rect giselschaft ze Raprecht[swile] sich ze antwurtenne bi ir trvwe vnd dannan neimer ze komenne e das si gewert wirt als davor geschriben ist Vnd wer das das der gisel deheiner nit were so sol er ir ein andren geben inrob veirzehen necten oder de andren zwene svn sich antwurten in de giselschaft vnzit das der dritte geben wirt Vnd sol och Jo vnd sin erben de selben gisel von allem schaden wisen Er hat ir ovch geben drv stuki gelz ze Wurenspach de si von ir vatter dar bracht hat de von vns leen sint das selbe govt han wir ir eigenlich geben also das si mit dem selben govte schafe vnd tege als das ir wille si geben manne oder wibe gestlich oder weltlich Wand sol ovch das wissen das swester Geri dv vor genande sich enzihen hat gegen ir brovder vmbe dis govt alles des si warten solte von ir vater erbschaft Vnd das dis stete belibe so hein wir ze ir beider bette disen bref besigelt offenlich mit vnserem ingesigel Dis beschac ze Raprecht[swile] vf der burg do zegegen waren dise gezuge her R der lutpreister [] der Wiso von Zurich phaffe Ja der schultheize von Raprecht[swile] [] der schovlmeister Jo der schriber R von Hasla Vol Banwart Bur Levdegast H der amman Possinkon Boni Vischili vnd ander genoge do von gottes geburte waren zwelfhvndert vnd veir vnd nvnz iar an dem samstage nach des heiligen kruces mes ze mittem herbste