Charter Document - 04060346

Wir vrow Elizabete grefenne von Honberg vnd frowe von Raprechtswile kvnden allen die disen brief sehent ald horent lesen das wir von hern Diethelns bette von Windegge mit vnsers vogtes hant hern Rvodolfes von Wedeswile den wir vber dise sache ze vogete genomen han vnd ovch mit vnsers svnes willen Wernhers der da zegen was die vogeteie ze Vnderbach die er von vns ze lene hate vnd vns vf geben het die selben vogeteie mit allem rechte als sv vns von vnsren vordren der herschaft von Raprechtswile von eigenschaft an komen ist [] dem abt vnd sim goteshvs von Rvti geben hein vnd geben an disem briefe mit wasen mit zwie mit holtz mit velde vnd mit alre ehafte in eigenlich gewer ewichlich ze besitzen ane alle wider rede vnd geloben in fur vns vnd fvr vnser erben das dise gabe stete si ane allen kriech vnd wir sv dar an niemer bechvmberren an deheim gerichte weltlichem ald geslichem Vnd das dis stete belibe so geben wir in disen brief offenlich besigilt mit vnserm ingisigel vnd mit vnsers vogetes ingisigil des vor genanden heren von Wedeswile Dis beschach ze Raprechtswile vf der bvrch da ze gegen waren maister Volrich der kilichere von Walde her Rvedeger von Werdegge her Albrecht von Vrinchon her Heinr von Thvnrethon Dietheln vnd Chventzelman sin brvoder von Vrinkon Jacob der schvlthetze von Raprechtswile Heinr der amman von Grinovwe Volrich der Heiden vnd ander erberre lvte do nach gotes geburte waren zwelfhvndert vnd nvnzig jar do beschach es in dem vierden jare an dem nvnden tage herbestes