Charter Document - 04060342

In gottis namin amen Swer disin brief sihit ald horit lesin der sol daz wissin daz ein lieblich schidung gischehin ist inszwschen abt Bertdold von sant Johans in Turtal vnd sinim conuent vnd Bertold dem Kurzin vnd sinir wirtin Adilheit vnd alr sinir kinde vnd alr sinr erbon vmb die manslat so er tet an sinim aeigin herrin dar umb im unsir geistlichir vattir der babst vnd sinir wirtirn vnd sinen kindin allen vnd allen sinin erbon het widir teilt akkir vnd wisan hus vnd hof aeigin vnd lehin von dem selbin gotzhus Vnd disu schidung ist also gischehin daz der vorginant Bertold der Kurz vnd sin wirtin Adilheit vnd sinu kint vnd alle sin erbin hein uf gigebin hus vnd hof akkir vnd wisan vnd allis daz siu von dem selbin gotzhus hetton vnd allie die ansprach die siu gen dem selbin gotzhus hetton so tur so einin phenning virwegin mag Vnd dar umb so git im vnd sinen erbon der vorginant abt vnd sin conuent zwelf phunt phenning Kostinzer muns Vnd wirt du schidung iemir gibrochin von dem selbin Bertold dem Kurzin ald von keinim sinim erbin so sun siu sin in dem banne unsir geislichin vattirs des babst vnd in allen schuldin als des tagis do er sinin aeigin herrin schlvog Vnd dar zvo so her graue Hug von Werdinberg der bedunthalb vogt vnd herre ist gilobt zi schirmin mit libe vnd mit gvot daz selbe gotzhus ub diu schidung gibrochin wirt Vnd daz dis stete bilibe so enkint der selbe vogt graue Hug vnd der abt mit dem conuent von sant Johanne iru gewerin insigil an disin geginwurtigin brief zi einim gewerin urkunde als an disim brief gischribin stat Dis gischach zi Werdinberg in Volrichs hus des Litscher da zigegin warint di hie nach geschribin stant die ovch dir selbe schidung gezuge sint graue Hug von Werdinberg her Herman von Sulzberg her Wilhelm von Richinstein her Wernher Gotschalch Henr der amman von Grabz Volrich vnd Arnold der Koch vnd Wilhelm von sant Johanne vnd andir bidirbir liute genvoge in dem jare do man zalte von gottis giburte zwelf hundirt vnd vier und nunz jar