Charter Document - 04060338

Willehelmus dei gratia abbas necnon conventus monasterii sancti Galli ordinis sancti Benedicti Constantiensis dyocesis universis presentium inspectoribus affectum caritatis cum salute Cum omnium habere memoriam potius sit divinitatis quam humanitatis expedit ut ea que publice et bona fide aguntur ne cuiusquam valeant tergiversari calumpnia scriptorum testimonio roborentur Noverint igitur quos nosse fuerit oportunum quod nos vocatis omnibus qui de iure vel commode vocari poterant et debebant tractatu secundum formam iuris prehabito diligenti non semel sed multotiens servatis omnibus sollempnitatibus et circumstantiis que circa alienationes rerum ecclesiasticarum servari debent secundum canonicas sanctiones cum ab onere debitorum et usurarum voragine nisi per modum alienationis rei ecclesiastice non possemus aliquatenus liberari de communi consilio et consensu maioris et sanioris partis conventus nostri cum non habuerimus aliquas possessiones que monasterio nostro fuerint adeo inutiles et pro quibus nobis maius pretium solveretur quam curiam in Kussenach cum suis pertinentiis prope lacum Thuricensem et cum non inveniremus aliquem qui tantum pretium nobis offerret pro ipsa licet pluribus exhibuerimus quam Heinricus nobilis de Tengen qui predictam curiam a nostro monasterio iure tenuit feodali predicto Heinrico ius et proprietatem que nostro monasterio competiit seu competere videbatur in predicta curia in iure patronatus parrochialis ecclesie et prebendarum ipsi curti annexo et in hominibus feodis que vulgo dicuntur cinslen vel erblen agris pratis pascuis piscinis molendinis nemoribus aquis aquarumve decursibus virgultis viis et inviis cultis et incultis et generaliter cum omnibus pertinentiis suis vendidimus et tradidimus iure proprietatis pro se et suis heredibus recipienti et ementi pro pretio septuaginta quinque marcarum argenti ponderis Thuricensis ad habendum tenendum et possidendum et quidquid ei vel suis heredibus deinceps placuerit perpetuo faciendum cum omnibus et singulis pertinentiis et iuribus suis aquis aqueductibus silvis pratis pascuis viis et inviis banno districtu accessibus et egressibus cum omnibus et singulis que habet supra vel infra seu intra se in integrum omnique iure et actione usu seu requisitione nobis ex eadem vel pro eadem curia aut ratione ipsius curie modo aliquo pertinente Quod pretium confitemur nos ab ipso emptore habuisse et recepisse ac nobis integre datum et solutum et numeratum esse ac in utilitatem nostri monasterii convertisse exceptionibus non dati non soluti et non numerati pretii et deceptionis ultra dimidiam iusti pretii beneficio restitutionis in integrum et omni alii auxilio omnino renuntiantes promittentes pro nobis nostrisque successoribus dicto emptori pro se et suis heredibus stipulanti litem vel controversiam ei vel suis heredibus ullo tempore non inferre nec inferenti consentire sed ipsam curiam cum suis pertinentiis tam in proprietate quam in possessione ei et suis heredibus ab omni homine et universitate legitime defendere et predictam venditionem et omnia et singula suprascripta perpetuo firma et rata habere et tenere et non contra facere vel venire per nos vel per alios aliqua causa vel ingenio de iure vel de facto et reficere et restituere sibi omnia et singula dampna et expensas ac interesse litis super quibus optinendis et probandis ipsius emptoris credi volumus sacramento Ad que omnia et singula facienda et firmiter observanda nos nostrosque successores presentibus obligamus Verum cum in alienatione rei ecclesiastice singulorum fratrum subscriptio requiratur nos Rumo decanus operis Hiltboldus de Werstein thesaurarius Heinricus de Ramstein portenarius Hugo et Heinricus fratres de Durhein sacerdotes Volricus de Drupurg dyaconus Heinricus de Lupfen et Johannes de Guttingen subdyaconi qui tractatui alienationis interfuimus et consensimus cum non omnes scribere valeamus magistro Berchtoldo dicto Helnbolt notario nostro damus in mandatis ut nomine nostro subscribat et nichilominus in evidentiam et robur omnium premissorum sigilla nostra videlicet [] abbatis et conventus huic carte apponi fecimus et appendi Acta sunt hec et publicata coram testibus infrascriptis ad hoc vocatis pariter et rogatis in monasterio nostro predicto anno domini MCCLXXXXIII festo beati Nicolai in dictione VII Testes autem qui predictis interfuerunt sunt hii Heinricus de Griessenberg nobilis Heinricus de Glatte rector ecclesie in Surse magister Volricus Wolfleipsche canonicus Thuricensis Chunradus pincerna de Landegge miles Waltherus de Altstetten Chunradus de Luterberg Egelolfus Monetarius Hermannus de Reine Heinricus Rovwat Chunradus Sporer et alii quam plures fide digni Ego magister Berhtoldus notarius predictus iniuncto michi mandato a predictis dominis nomine et auctoritate ipsorum huic carte manu propria subscripsi Et in signum subscriptionis sigillum meum presentibus apposui anno die et indictione prenotatis