Charter Document - 04060337

Allen die disen brief sehent ald hoerent lesen kvnden wir vro Elizabeth greuenne von Raprechtswile dc wir von der gvlt schulden die wir han von vnseren wegen vnd von vnser kinden wegen vnser mvli dv ze Geiletal an der Kemtvon lit dv vns eigenlich anhoert die wir geerbet han von vnserem bruder seligen graven Rudolf von Raprechtswile verkovft han mit grvnde vnd mit wasser mit achern vnd mit wisen mit holz vnd mit velde vnd mit allem dem rechte vnd mit aller der ehaftigi so ze der mvli hoert Chvonrat dem Schoenower von Mosburch vnd Chvonrates des Zwigers kinden von Ilnowe fvr ein lidig eigen vmb achzehen march loetiges silbers Zurich gewicht vnd sien der gewert alleklich vnd veriehen des an disem brieue Vnd hein wir vnd vnser kint inen die mvli vnd swc darzvo hoert vf gegeben an ir hant fvr lidig eigen vnd han diz getan mit des edelen herren hant vnd willen hern Rudolfs vrien von Warthe ritters der mit rechter vrteilt vns ze voget wart gegeben ze verkovffenne die vorgenant mvli vnd ze volfverren den kovf dc wir mit dem silber ein teil vnser not die wir han von gvlte moechten vberwinden Wir loben ovch vnd binden vns vnd vnser erben dc wir Chvonrates des Schoenowers von Mosburch vnd Chvonrates kinden des Zwigers von Ilnowe vnd ir erben vnd ir nachkomen wer sien der mvli vnd swc ze der mvli hoert fvr lidig eigen an allen gerichten geistlichen vnd weltlichen swa ald swenne siv es bedvrfent Vnd ze einem offennem vrkvnt alles so da vorgeschriben stat geben wir inen vnd ir nachkomen disen brief mit vnserem vnd hern Rudolfs vrien von Warte ritters des vorgenanden vnsers vogetes ingesigeln besigelt offenliche Diz geschach Zurich an der offennen Strasse vor dem kloster dc da heisset Oetenbach an sant Nicolaus abent do von gottes geburt waren zwelfhundert jar in dem dritten vnd nvnzegostem jare Vnd wc da ze gegen graue Rudolf von Habsburch her Ruedege ritter von Werdegge Jacob von Slatte Johans hern Heinrichs ritters von Kloten svn her Hartman vnd her Chvonrat Saler Heinr Kvogat Rudolf in dem Kelre Hug von Meilingen vnd ander genvog gezugen die hiervmbe dar gebetten vnd komen waren Ich her Rudolf vrie von Warthe ritter wan ich mit rechter vrteilt miner vrowen vron Elizabethen greuennen von Raprechtswile ze voget bin gegeben vnd von ir genomen ze verkovffen vnd ze volfuerren die vorgeschriben mvli vnd dc darzvo hoert vergich vnd offenen dc min vrovwe dv vorgenande die mvli vnd swc dar zvo hoert verkovft vnd vfgegeben het mit miner hant vnd willen als da vorgeschriben stat vnd durch ir bette henk ich min ingesigel an disen brief ze einem offennem vrkvnt alles so da vorgeschriben stat vnd han diz getan vnd ist geschehen an dem tage vnd der stat vnd in der jarzal als da vorgeschriben stat