Charter Document - 04060329

Allen die disen brief sehent alde hoerent lesen chvnden wir Elisabeth grevin von Homberg vnd frowe ze Rapreswile grave Herman von Homberg vnd Ita sin swester grevin von Homberg das wir vnser eigen swas wir hatten ze Meriswandon lvte vnd gut vnd den hof da der chilchen saz in hoeret mit alr ehafti mit wisen mit aker mit holze mit velde mit wunne mit weide mit wasser rvnse vnd mit allem dem rechte als wirs dar hatten bracht verchovft vnd geben hein hern Goetfrid von Hvnoberg zeigne vmb zwenzig vnd dru hvndert march loetigs silbers vnd sin ovch der gwert alleklichen vnd ist dis beschehen mit mis vogtes hant hern Rvodolfs von Wediswile des frijn den ich vber die sache nam Vnd ich Ita von Homberg dv grevin han es ovch getan mit mis vogtes hant grauen Hermans von Homberg mis bruder vnd sol ich dv vorgnande grevin Elisabet wer sin der vorgnanden lvte vnd gueter an geislichem vnd an weltlichem gerichte vnd an allen den stetten da sin her Goetfrit von Hvnoberg bedarf gegen rechte ald sin erben ob er enwere Vnd han ovch gesworn zen heiligon offenlichen das ich die vorgnanden lvte noch gut niemer gevordron sol an geislichem noch an weltlichem gerichte noch an keinr stat da es hern Goetfride von Hvnoberg ze schaden kome ald sinen erbon Ovch han ich bvrgen geben fur minv chint Wernhern Rvodolfen Lvdwigen Zilien vnd Clarvn swenne sie zir tagen komen das sie die vorgnanden lvte vnd gut vfgeben svn vnd vertgon hern Goetfride von Hvnoberg ald sinen erbon mit allem dem rechte vnd der gwarsami als er sin bedarf ald sin erben Vnd sint dis die bvrgen graue Herman von Homberg her Rvodolf von Wediswile her Rvedge von Werdegge her Peter von Ebtingen Jacob der schulthezze von Rapreswile Heinrich von Ebnoede der amman Albrecht von Rvti Walther Glarner Johans Gamlvnstein Heinrich der Amman von Rapreswile Volrich von Chaltbrvnnon Kraft von Ebnoede Chvonrat der Truchsezze Heinrich der Marschalch Rvodolf von Wagen Wernher von Rambach Arnolt Loeidgast Heinrich Ekol Chvonrat der Banwart vnd Dietrich Heginli vnd hant die selben burgen globt bi ir truwe an eis eides stat sich Zvrich ze entwurtenne in recht giselschaft ane alle geverde nach der stat gwonheit ald ieliehe ein ersamen man ze leginne an sin stat ob er wil mit hern Goetfrits wissinde von Hvnoberg ald sinr erbon ob er enwere swenne sie gemant werdent von in ald von ir gwissen botton dar nach inrunt acht tagen vnz in volfvort werde ganzlichen alles das da vor geschriben stat Vnd were das dirre burgon deheine vssrunt landes were ald in einr ander gisilschaft lege ald swelen weg er vnnuzze were so sol ich ein andern legen an des stat mit hern Goetfrids wissinde ald sinr erbon Were aber da vor got si das ir keine verdurbe so sol ich ein andern geben an des stat inrunt eim manode so ichs ermant wirde ald die andern burgen sun gisil ligen vnz das beschicht Vnd swenne die burgen gemant werdent so svn sie sich entwurten inrunt acht tagen in die gisilschaft als da vor geschriben stat Vnd das dis stete vnd veste si vnd volfuert werde so geben wir Elisabet grevin vnd graue Herman von Homberg hern Goetfride von Hvnoberg disen brief vnd sinen erbon besigilten mit vnsren ingesigiln vnd mit der burger von Rapreswile gemeinem ingesigile zeim rechten vrchvnde offenlichen Dis geschach do von gottes geburt waren zwelfhundert vnd nvnzig jar vnd dar nach in dem dritten jare drier tage vor sant Paulus bicherde Zvrich vssrunt des graben an dem rossemargte da ze gegni waren gezvge her Rvodolf der Mvlner her Rvedge Manesse des elter vnd her Rved sin svn her Rvodolf der lvprester von Barra Rvod der Biber her Wernher Bibirli Johs Wolfleibscho Rvod vnd Hartman von Chlotun vnd ander ersam lute gnuge