Charter Document - 04060327

Omnibus Christi fidelibus presentem litteram intuentibus Hainricus Waltherus et Cvonradus fratres dicti de Ramswag milites notitiam subscriptorum Cum diuturnitas temporum nonnumquam mentis oblivionem inducat que materiam prestat calumpniandi utilitas exposcit gesta modernorum serie scripturarum perennari Ea propter noverint omnes quos nosse fuerit oportunum quod urgente nos onere debitorum de consensu heredum nostrorum ac aliorum quorum intererat possessiones nostras in Bregensdorf et in Ranwile quas a monasterio sancti Galli in feodum tenuimus et possedimus quasque [] abbati dicti monasterii sancti Galli liberaliter resignavimus honorabilibus in Christo [] abbati et conventui monasterii in Salem cum pratis agris pascuis cultis et multis pomeriis silvis aquis aquarumve decursibus viis inviis necnon Walthero dicto de Bregensdorf [] uxore ac liberis suis utriusque sexus tam genitis quam gignendis iurisdictionibus necnon pertinentiis et iuribus universis tam corporalibus quam incorporalibus quocumque nomine censeantur adhibitis verborum ac gestuum sollempnitatibus debitis et consuetis rite et legitime vendidimus pro ducentis et decem et novem marcis argenti puri et legalis ponderis Constanciensis quod nos recepisse ac in evidentes nostros usus converrisse profitemur renuntiantes pro nobis nostrisque heredibus universis circa premissa omnia benefitio restitutionis in integrum principaliter vel incidenter exceptioni non numerate pecunie litteris a sede apostolica vel aliunde impetratis vel impetrandis defensioni non adhibite sollempnitatis omnibus constitutionibus et statutis tam editis quam edendis constitutionibus generalibus particularibus et localibus quibuscumque et generaliter omni suffragio tam in spetie quam in genere quo mediante predicta venditio possessionum et hominum ullo unquam posset tempore violari Nichilominus nobiles et strennuos viros dominos Hvgonem comitem de Werdenberch Rvodolfum et Diethalmum dictos de Gvttingen Johannem de Bodemen Rvodolfum et Hermannum fratres de Svlzberch Marquardum et Volricum fratres de Schellenberch Johannem de Schoenenberch Rvodolfum de Stainach Volricum dictum Giel de Glatburg milites et Cvonradum de Castello abbati et conventui predictis obligavimus fideiussores in solidum pro eo videlicet quod cum liberi Burchardi Dietrici quondam germani nostri ad legitime etatis annos pervenerint prescripta omnia litteris et sigillis suis ratificabunt ac sine dolo rata perpetuo observabunt Quod si non fieret prescripti fideiussores sicut prestito sacramento corporali promiserunt moniti ad obstagium in civitate Constanciensi se presentabunt nullatenus exituri donec per eosdem liberos prescripta omnia compleantur Si vero aliquem predictorum fideiussorum medio tempore cedere vel decedere contigerit nisi alter infra quindenam per nos eque bonus substitutus fuerit superstites ad obstagium se recipient inde non recessuri donec alter ydoneus cedenti vel decedenti fuerit subrogatus Insuper obligamus nos nostrosque heredes predictis abbati et conventui ipsorumque successoribus per stipulationem sollempnem et legittimam ad subeundum pro ipsis in quocumque iuditio ecclesiastico vel civili in premissis omnibus plenam warandiam omneque periculum evictionis sine ipsorum laboribus et expensis Datum et actum Constancie anno domini MCCXC tercio XV klnd marcii indict VI presentibus testibus videlicet fideiussoribus suprascriptis necnon domino Volrico abbate monasterii in Salem fratre Eberhardo de Stekeboron fratre Burchardo de sancto Stephano et fratre Dietrico de Bermetingen seniore monachis monasterii memorati aliisque quam pluribus fide dignis