Charter Document - 04060320

Ich her Johans von Humlinkon ritter kund allen dien die disen brief an sehent alde hoerent lesen das ich Chunraten Stephan von Hoengge der min len ist von Regensberg der sant Gallen eigen ist gibe zeinem rechten hindersezzen dem probste vnd dem capitel von Zurich uf den meierhof ze Hoengge also das si recht gegen dem selben Chunrate Stephan heigin nach des landes gewonheit fur ein rechten hindersezzen Ich binde mich ooch des das ich sunderdienste an den selben Chunraten Stephan nit vordre ze dienste noch ze sture wan dar nach als ich gemeinlich an die andern lute die des gotshuses sint vordren die in der vogtege sint ze Hoengge Vnd darvmbe das dis stete vnd veste si so gib ich inen disen brief besigelt mit minem ingesigel zeinem offennen vrkunde Dirre brief wart geben ze Winterture in dem jare do von gottes geburt waren tusent zwei hundert vnd in dem zwei vnd nunzegosten jare an dem zistage nach sant Verenen tage do indictio was du funfte