Charter Document - 04060318

In gottis namen amen Ich Heinrich der Blarrer ratgebe des spitalis ze sante Gallen kivnde allen den die disen briefh lesint alt hoerint lesin dc Johans der Tivesche kovfman den hove ze Livchingin den er kovfte vmbe Cvonraden den Litscher von Werdinberc vnd vmbe Volrichin sin svn het gegebin livterlich dvre got dem spitale ze sante Gallen mit siner wirtinne willen vron Jvdinthvn Hainrichs saeligin tohter dz Vedirers von Altstetin Den enpfienc ich an des spitalis stat also dc ich den selbin hof sol tragen deme spitale vnd Johanse dem Tivschim kovfman vnd siner wirtinne vnd ist gedingit dc er vnd sin wirtinne vnd alle ir lib erbin des selbin hovis nvzze son niessin vnd erbin mit allim rehte vnz dc siv lebint vnd sol Johans vnd sin wirtinne die wile siv lebint gebin dem spitale ze cinse an sant Gallen tage ain pfvnt wahsis vnd swedirs dc ander vber lebit dc sol danne vnz es lebit deme spitale gebin fivnf Schillinge ze dem jargezite Ovch ist gedingit dc alle ir lib erbin die siv samint gewinnent den vorgenanten hof son enpfahen von deme spitale nah ir vatter vnd ir mvoter tode iegelich kint mit sehse pfenningin vnd sol der spital dc selbe gvot danne inen lihen vnd allen iro lib erbin ane alle wider rede vnd son die selbin libe erbin nah ir vatter vnd ire mvoter tode dem spitale gebin jarlich ze den jargeziten zehen Schillinge Vnd swenne der spital vberlebit die lib erbin alle so ist der vorgenande hof ledig dem spitale Geschith ovch dc dc Johans vnd sin wirtmne sterbint ane lib erbin so ist aber der vorgeshriben hof deme spitale gar vnd ganzzelich ledig Gewinnet ovch diwedirs nah des andern tode andirv kint dv son dz selbin gvotis nith erbin vnd swenne siv beidv sterbint so ist aber der vorgenande hof dem spitale ledig Vbir dc ist ovch gedingit wil Johans alt sin wirtinne vro Jvdinthe dz Vedirers saeligin tohter alt iro lib erbin den selbin hof vmbe dikain iro not verkovfen dc son siv tvon in dem rehte alse siv in niessint Vnd dc dis allis dc hie vor geshribin stat ganz vnd staete belibe so henke ich Hainrich der Blarrer min ingesigile vnd der spital sin ingesigile an disen geginwrtigin briefh ze ainem staetin vrkivnde Dis geschach do man zalte von vnsirs herrin gebvrtlichin tag tvsint jar zwai hvndirt jar vnd nivnzic vnd zwai jar Da zegegine was brvodir Rvodolfh dz spitalis pfleger Heinrich der Smit Hainrich der Kovfman Wernher der Hvnt vnd ander erber livthe gnvoge