Charter Document - 04060315

Allen die disen brief sehent ald hoerent lesen chvnden wir Elisabet grevin von Homberg vnd frowe ze Rapreswile einhalp vnd anderthalp der rat vnd die burger gmeinlich von Zvrich das wir vberein sin chomen vnd hein es ovch gesworn zen heilgon offenlichen ein andren ze ratinne vnd ze helfinne mit lib vnd mit gvote mit vnsren lvten vnd mit vnsren vestinon gegen alr menlichem gegen rechte hinnan ze wiennacht vnd dannan vber drv jar mit allen dingen Ovch hein wir die burger von Rapreswile mit vnser frowen willen von Homberg der grevin gesworn offinlich den burgern von Zurich vnd sie vns ze ratenne vnd ze helfinne so verre vns beidenthalp lib vnd gvot gelangen mag gegen alr menlichem gegen rechte dis jarzal vs als da vor geschriben stat Ovch sin wir beidinthalp ein andren gebvnden vf vnsern eit von disim vrlvge da wir ieze inne sin gegen den herzogon von Oesterrich vnd allen ir helfern niemer ze scheidenne wan mit einr ander rate vnd willen Were ovch das ein Roemschir chvnk cheme der gewaltig wurde ze Basil ze Chostinz vnd Zurich in dirre jarzal so sol doch disv glvbde stete sin wand alleine gegen dem chvnge Vnd dar vmbe das dis stete vnd veste blibe dis jarzal vs als da vor geschriben stat so hein wir zwen gliche brieve gemacht vnd besigilt mit vnserm ingesigil fron Elsbetun der grevin von Homberg vnd frowen ze Rapreswile mit der burger ingesigil von Zurich vnd mit der burger ingesigil von Rapreswile zeim rechten vrchvnde offenlichen Dis beschach Zvrich an der mitchvn vor sant Andres tult in dem jare do von gottes geburt waren zwelfhvndert vnd eis vnd nvnzig jar do indictio was Va