Charter Document - 04060312

In dem namen des vatters vnde des sunes vnde des hailigen gaistes amen Ich Volrich von Ramenswag der alte tun kunt allen den die disen brief lesent oder hoerent lesen daz ich nach dem rate mines herren des abtes von Salmanswiller mit miner svn Hainrich Walthers vnde Cunrats willen miner sele dinch vnde ir haile han gesetzet vnde geordenot als hie nah gescriben ist Vnde bi dem ersten wil ich daz min herre der abt sich vnderwinde der zinse der vogtaige des gotshuse ze sant Gallen du mir stat von minem genaedigem herren saeligem dem kunig vmbe minen dienst vnde des houes ze Griezzerrun vnde der gut du ich dar zu benemmet han an ainem brief vnder minem insigel nach minem tode zehant vnde daz er sv enphelhe zwain alder drin miner manne die er darzu erwelle die die zinse in nemen vnde du gut besetzen vnde entsetzen vnde im aellu iare antwrten die zinse vnde daz gelt der gute ze Costenz ald ze Salmanswiller daz er da mit gelte vnde wider gebe allen den den ich schaden han getan nach hern Rudolfs von Guttingen vnde hern Hermans von Sulzberch Johannes von Anwile Peters von Ramenswach vnde Volrichs von Suls rate die dar vmbe gesworn hant daz si mit truwen ervaren wa ich schaden habe getan daz man da gelt Swenne aber vergolten wirt fur mich so sol der vorgenemmet abt daz gelt von den phanden vnde von den guten du da zvo benemmet sint in nemen alse lange daz er hundert marke silbers gewert werde vnde wirt er der des ersten iares niht gewert so sol er des andern iars niescen alse vil so im des ersten gebrast vnde sol daz gut vnde dv phant wider an mine svn ald an mine erben vallen vnde sol er mit den hundert marken ain aigen kovfen vnde von dem gelt des aigens aellu iar siner samenunge gen an dem hailigen abent ze osteron vnde an dem tage mines iargezites ainen dienst von Nekkerwin vnde von guten vischen durch miner sele willen Ist aber daz er des niht entut so sol er daz gelt daz von den hundert marken chumt des iars so es versumet wirt der aebtissenne vnde der samenunge von Maggenovwe antwrten mit truwen Geschiht ovch daz ain kunich du vorgenemtem phant bi minem leben loeset so binde ich mich an disem brief dem abt ald sinem nahkomen des silbers daz mir danne wirt von der loesunge hundert marke ze genne daz er ain aigen kovfe als in da vor gesprochen ist siner samenunge Das selbe sont ovch mine svn tun der dv phant nach minem tode von inen loeset Ich wil ovch daz mine sune die vorgenanden oder ir erben ob si ensint nach minem tode in zwain iaren hundert marke silbers dem vorgenemten abt ald sim nahkomen jetweders iars funfzech marke geben ob es bi minem leben niht geschiht daz er da mit ain aigen kovfe vnde von dem ainen alter stifte vnde daz gelt niesche iemer me dar vmbe daz er ains priesters me habe iemerme der da messe spreche durch miner vnde miner vorderon selen willen vnde miner sune Waere ovch daz mir got die gnade gaebe daz ich mich ze Salmanswiller ziehen wolti so sol mir min herre der abt ain erber hus da gen vnde sol daz gelt vnde die zinse der vogtaige vnde der gut in nemen vnde sunt im die das antwrten ze Salmanswiller als da vor gesprochen ist den ers enphilhet daz er da von mich selbe zwelften vnz an minen tot begange vnde gebe swes wir bedurfen Woelt aber ich me danne das gelt vnde der zinse verzeren so sol er mir niht gebunden sin me ze gebenne noch den die bi mir sint Wirt mir ovch iht vber des geltes da mit sol er gelten den den ich schaden han getan alse verre so daz raigot vnde nach minem tode so sol er dv phant vnde daz gelt niescen in allem dem reht alse da vor gescriben ist Tut ovch mir an den phanden oder an den guten ieman chainen schaden da sol der abt nach clagen als nach des closters aigenem gut vnde dar umbe bannen Vnde swaz er da verzert das sol er von dem selben gut nemen vnde sun wir ich vnde mine sune im des helfen alse vil so wir mugen Wirt aber er clagent nach den hundert marken die er niescen sol daz sol er mit sinem schaden tun Ich binde ovch mich ob ich zvoz im vare zwene aide drige von minen mannen im ze genne den er du gut vnde die zinse enphelhe alse da vor gesprochen ist des selben sont ovch mine sune gebunden sin nach minem tode noch sont im mine svne oder min erben dekainen schaden tun an den guten oder an den phanden noch den den ers enphilhet ald dekain irrunge vnz daz er vergilt vnde abe genuscet daz er da niescen sol Vnde daz disu dinch dv da vor gescriben sint staet beliben so hant mir mine sune ze den hailigen gesworn daz si daz laisten alles daz daz si da an triffet Vnde zainer sicherhait der selben dinge so hant si dem abt geben zehen burgen die hie nach gescriben sint hern Rudolfen von Guttingen hern Rudolfen vnde hern Herman gebruder von Sulzeberch hern Rudolfen von Stainach hern Burcart von Anewile hern Hannes von Schoenenberch hern Gerbolt von Mulhain hern Hainrich den Loewen von Zuckenriet hern Cunrat von Haidelberch vnde [] Vnde hant die ze den hailigen gesworn ob mine svn niht enlaistent daz da vor gesprochen ist daz si sich antwrten ze Costenz in die stat von dem tage daz si von dem abt gemanet werdent in ainem manode vnde miner svn aine Hainrich Walther oder Cunrat mit inen vnde sunt da ze gisel ligen vf miner sun schaden vnde niemer dannen komen e mine svn gelaistent dem abt des si gesworn hant oder mine erben noch sol der abt furst daz er die burgen gemanet dekainen gewalt han inen vrist alde tage ze genne vnde wil ir chainer von redelicher vnde von rehter sache dannen varn so er sich geantwrt so sol er ainen andern an sin stat legen der ze dem munde alse ture chome als ob er selbe da laege Stirbet ovch der burgen chainer so sont mine svn dem abt ainen andern gen an sine stat vnde tunt si des niht so sol er der lebenden vier manen swele er wil vnde sunt sich die ze Costenz antwrten vnde niemer dannen komen e mine svn ainen andern an des stat gent den er genimt Woltin ovch mine sune vnde die burgen ir aide vergessen daz si niht laisten woltint des si gesworn hant so sol der abt si mit geriht vnde mit baennen dar zvo triben daz si es laistent Swenne ovch du gut vnde du phant geuallent wider an mine svn oder an mine erben so sont si gebunden sin iemerme ze gelten allen den den ich schaden han getan den der abt niht vergolten habe Vnde zainem vrkunde allr dirre dinge so han ich disen brief gehaiscen besigelt mit mines herren des vorgenanten abts insigel vnde der burgen allerr die da vor genemmet sint vnde mit dem minen vnde miner svn Hainrich Walthers vnde Cunrats Dis geschah ze Ramenswage do von vnsers herren geburt waren tusent zwaihundert vnde ains vnde nunzech iare in dem brachot an sant Vitez tag vnde waren da bi dise gezuge her Rutlieb der cappelan her Hainrich von Bernegge Rudolf der Giele vnde Volrich sin bruder Willehalm von Schoenenberch Swigger von Loewenberch Johannes von Yberch Johannes von Kessewille Burcart von Anewille bruder Eberhart von Stekboron bruder Dietrich von Bermetingen munich von Salmanswiler vnde ander biderbe lute Swaz aber ich Volrich von Ramenswag da her ordenunge getan han durch miner sele willen oder gesetzet daz widertun ich an disem brief vnde wil daz disu ordenunge allaine staete belibe Wir der abt von Salmanswiler vnde du samenunge veriehen daz alles daz an disem brief stat ware ist vnde binden vns ze laistenne alles daz vns an triffet des hie vor gescriben ist mit truwen Vnde zainem vrkunde so henken wir vnser insigel an disen brief Wir Rudolf von Guttingen Rudolf vnde Herman von Sulzeberch Rudolf von Stainach Burcart von Anewille Johannes von Schoenenberch Gerbolt von Mulhain Hainrich der Loewe von Zuckenriet Cvonrat von Haidelberch [] Hainrich Walther vnde Cunrat von Ramenswag ritter die hie vor genemmet sint veriehen daz alles daz daz an disem brief stat war ist vnde binden vns daz ze laistenne ane alle gevaerde vf den ait den wir gesworn haben Vnde zainem vrkunde so henken wir alle vnserv insigel an disen brief