Charter Document - 04060311

In gotes namen amen Wir Willehelm von gotes gnaden abbet ze sante Gallen viriehen an disim brieve offenliche vnde kvnden allen den disen brief ane sehint oder hoerent lesin daz wir durch die liebe vnde durch die bette der burgerre vnde gemainliche ze sante Gallen der stat mit dem willen vnsers conuentes vnde mit dem raete der tivrsten vnsers gotshus dienestmanne daz alte reht der selben stat wider gemachet han vnde ir dise hantueste dar vbir gegebin han wider den hantvestinon die ir ze ainir allicher brunst verbrunnen warent da es von altir ane geschriben waz vnde die ir von vnserme gedigene vnde von kaisern vnde von kunigen gegeben vnde gevestent warent Daz selbe reht daz ist alsus gescaffen Daz alliz daz gvot daz inrrent den vier crivcen vnde von der obenendi der berge bi der stat dis inheldi ze tale lit swelhe livte daz nv haben alde iemir reht vnde redeliche gewinnen alde von swem man es heige alde rehte vnde redeliche gewinne daz daz in dem selben rehte stande alse Costinzer aygen an erbinne an virkovffenne an virsezzenne ane daz daz genes aygen vnde dis lehin ist vnde ane daz obe ain kovf hie sol beschenen daz der verkovffende vf sol geben in des lehinherren hant swer der ist vnde sol der kovffinde dannan enphahen vnde sol dem herren ain viertail lantwins geben Hat abir ir ainer oder si baide des herrin hulde niht vnde wil er da von ieneme rehtes lehines oder enphahens verzihin so sol man ime aide sinime ehaftigen ammanne den win bieten vnde sol der kovf irgangen sin vnde swenne der kovffinde iemir dar nach mag beredin mit zwain sinin husgenozzen so sol ime genes an sinime rehte kain schade sin Vmbe dis erben ist es alsus geschaffin swer disses gvotes iht hat es si man odir wip stirbet der ane kint den sol sin naehestir vatermag erben es si wib oder man Vindet abir man der inhainen so sol es mvotir halb daz naeheste tvon Wil ovch ieman des gvotes iht versezzen en phandes wis der sol dar gan vnde sol mit der hant dar ane griffen vnde sol es in phandes wis in genes gewalt der es da verphenden wil gebin vnde sol dar zvo kainin herrin niwet ane sehin Enhain man alde wip der disses gvotes hat der sol niender dar vmbe ze rehte stan wan vf der phallenze ze sante Gallin vnde eht vor dem abbete Unde sol es ovch niene mitte verliesin noch gewinnen wan mit dem rehte vnde mit der vrtailde da mitte ovch Costincerre ir aygen behaltent vnde verlierent Wirt ovch et mer danne ain vrtailde vbir daz selbe gvot gesprochen vnde belibent die hie vngesamenot also daz der strit hie niht mag geschaiden werden so sol man es dar vmbe niene ziehin wan sol eht die die vrtailde gesprochen hant ze Costince senden ir reht dar vmbe da zirvarnde vnde swas die wider sagent dar nach sol es der abbet endelichen rihten Wir veriehen ovch an diseme selben brive daz wir von dehainim menschen der niht sempaere ist noch burgerreht hat mit swelheme andern rehte er vnser gotshus anehoeret vnde er doch ze sante Gallen seshaft ist vnde den burgern wachen hilfet vnde deme riche stivre gebint dekaine anesprache an in alder an sin erben suln haben weder an ligendeme gvote in den vier crivcen vnde obenendi der berge alse der sne sliffet noch an dekaime sime varnden gvote swa er es habe ane daz allaine daz er sin tivrste lebendes gvot ze valle geben sol Vnde obe er des niht hat ist er ain hagestolz vnde hat er varnde gvot vnde stirbet er so sol man gelten von sinime varnden gvote verwissen gvlte die er gelten sol vnde sol der abbet sich des andern varnden gvotes vnderwinden Vnde hat er ain wip vnde stirbet er ane lib erben vnde lat er varnde gvot so sol man von sinime varnden gvote gelten verwissen gvlte die er gelten sol vnde sol der abbet danne des vberigen varnden gvotis nemen den halbentail vnde daz wip den andern tail Umbe diser selben livte erben ist es alsus geschaffen daz kint vnde wip erbent obe siv div hant obe si der enweders hant so erbent si ir naehesten vatir mage es si wip oder man vindet man aber der inhainen so sol es mvoter halb daz naeheste tvon Ist aber daz siv diser erben allir inhainen hant so sol der abbet alliz ir ligendes gvot daz ze margetsrehte lit in sin gewalt ziehen vnde behalten iar vnde tach vnde sol antwrten in der selben vrist allen den die von rehtime erbe dehaine anesprache dar ane hant Wir veriehen ovch an diseme brieve swer ain sempaerman ist oder burgerreht hat daz den nieman jerrin sol er mvge mit sinen kinden komen ze closter oder ze der e swar er wil Vnde veriehen ovch daz man dehainen burger von sante Gallen weder heften noch phenden sol an libe noch an gvote weder fvr abbet noch fur voget er si es danne selbe gvlte oder burge Vnde ze ainer ganzer vnde ewiger staete allir der dinge der wir an disime brieve veriehen haben so gelobent wir mit gvoten triwen daz wir werbende sin mit vlizze daz disiv hantveste bestaetet vnde besigelt werde von dem riche swenne daz cumet Vnde wir Willehelm der vorgenante abbet ze sante Gallen geben vnser isigel vnde vnsers conuentes isigel an disen brief ze ewiger staetekayt allir der dinge div hie vorgeschriben sint Dis geschach ze sante Gallen do von gotes geburte waz zwelhundert jare aines vnde nivzzich jare an deme zinstage nach sante Jacobes tage II In gotes namen amen Wir Willehelm von gotes gnadn abbet ze sant Gallen vergehn an disem briefe offenliche vnd chunden allen den die disen brief an sehnt oder hornt lesen daz wir durch die liebe vnd durch die bet der burgar vnd gemeinclihe ze sant Gallen der stat mit dem willen vnsers conventes vnd mit dem rate der tivrsten vnsers goteshuses dienstmannen daz alte reht der selben stat wider gemachet han vnd ir dise hantveste dar vber gegebn han wider den hantvestinon die ir ze einer aellicher brunst verbrunnen warn da ez von alter an geschriben waz vnd die ir von vnserm gedigene vnd von keysern vnd von kvnigen gegebn vnd gevestint warn Daz selbe reht daz ist alsus geschaffen Daz allez daz gut daz inrront der vier crucen vnd von der obenendi der berge bi der stat dis inheldi ze tal lit swelhe lute daz nv haben alde immer rehte vnd redeliche gewinne ald von swem man ez haige ald rehte vnd redeliche gewinne daz daz in dem selben rehte stande als Chostenzar aigen an erbinne an verchovffenne an versetzenne ane daz daz yenis aigen vnd ditz lehn ist vnd ane daz ob ein chovf hie sol beschehn daz der verchovffinde vf sol gebn in dez lehnherren hant swer der ist vnd sol der chovffinde dannan enphahen vnd sol dem herren ein fierteil lantwinez gebn Hat aber ir einer oder si beide dez herren hulde niht vnd wil er da von yenim rehtes lehennes oder enphahennes verzihen so sol man im ald sinem ehaftigen ammanne den win bieten vnd sol der kovf ergangen sin vnd swenne der kovffende immer dar nach mach beredn mit zwein sinen husgnoezzen so sol im ienez an sinem rehte chein schade sin Umb ditz erben ist ez alsus geschaffen swer disez gutes iht hat ez si man oder wip stirbet er ane kint den sol sin naehster vater mag erben ez si wip oder man Vindet aber man der enheinen so sol ez mvetir halp daz naehste tven Wil ovch ieman dez guetes iht versetzen in phandes wis der sol dar gan vnd sol mit der hant dar an griffen vnd sol ez in phandes wis in yenes gewalt der ez da verphenden wil gebn vnd sol dar zv keinen herren nivt ansehn Enhein man ald wip der disez guetes hat der sol niender dar vmb ze rehte stan wan vf der phallentz ze sant Gallen vnd et vor dem abbet vnd sol ez ovch niena mit verliesen noch gewinnen wan mit dem rehte vnd mit der vrtailde da mit ovch Chostentzar ir aigen behaltent vnd verliesent Wirt ovch et me danne ein vrteilde vber daz selbe guet gesprochen vnd belibent die hie vngesamenot also daz der strit hie niht mach gescheiden werden so sol man ez dar vmbe niena ziehen man sol et die die vrteilde gesprochen hant ze Chostentz senden ir reht dar vmb da zervarnde vnd swaz die widersagnt dar nach sol ez der abbet endelichen rihten Wir vergehn ovch an disem selben briefe daz wir von deheinem menschen der niht sempar ist noch burgar reht hat mit swelhem anderm rehte er vnser goteshus an horet vnd er doch ze sant Gallen sezhaft ist vnd den burgarn wachen hilfet vnd dem riche stivre gebn dekeine ansprache an in alder an sine erben svln habn weder an ligendem guete in den vier cruzen vnd obenendi der berge als der sne slifet noch an deheinem sinem varndem gute swa er ez habe ane daz alleine daz er sin tiurste lebendes gut ze valle gebn sol vnd ob er dez niht hat ist er ein hagstoltz vnd hat er varnde gut vnd stirbet er so sol man gelten von sinem varnden gute verwizzen gulte die er sol vnd sol der abbet sich dez andern varnden gvtes vnderwinden Vnd hat er ein wip vnd stirbet er ane lib erben vnd lat er varnde guet so sol man von sinem varnden gvte gelten verwizzen gulte die er sol vnd sol der abbet danne dez vberigen varnden gvtes nemen den halbenteil vnd daz wip den andern teil Vmb diser selben lute erben ist ez alsus geschaffen daz kint vnd wip erbent ob si div hant ob si der enweders hant so erbent si ir naehsten vater mage ez si wip oder man vindet aber man der enheinen so sol ez mveterhalp daz naehste tven Ist aber daz si diser erben aller enheinen hant so sol der abbet allez ir ligendes gut daz ze marchetrehte lit in sine gewalt ziehen vnd behalten iar vnd tach vnd sol antwrten in der selben vrist allen den die von rehtem erbe dehein ansprache dar an hant Wir vergehn ooch an disem briefe swer ein sempaer man ist oder burgaer reht hat daz den nieman irren sol er muge mit sinen kinden chomen ze chloester oder ze der e swar er wil Vnd vergehn ovch daz man deheinen burgaer von sant Gallen weder heften noch phenden sol an libe noch an gute weder fur abbet noch fur vogt er si ez danne selbe gulte oder burge Und ze einer gantzer vnd ewiger staete aller der dinge der wir an disem briefe vergehn habn so geloben wir mit guten trivwen daz wir werbende sin mit vlizze daz disiv hantveste bestaetet vnd besigele werde von dem riche swenne daz chumt Vnd wir Wil der vorgnante abbet ze sant Gallen gebn vnser insigel vnd vnsers conventes insigel an disen brief ze ewiger staticheit aller der dinge div hie vor geschriben sint Diez geschach ze sant Gallen do von gotes geburte waz zwelfhundert iar eines vnd nivnzech iar an dem zinstage nach sant Jacob es tage