Charter Document - 04060309

In gottes namen amen Wir herre Rvodolf von Gvtting[en] ain lant rihter in Rintal an kvnc Rvodolf von den gnaden gottes ain voct ze Rome an des stat tvogent chvnt an disem brief allen den die in lesent alde horent lesen daz Waltehr der anman von sant Gallen an der bvrger stat vnd an alles des landez stat claget hin zen bvrgern von Rinegge daz si naemen vershaz der dem lande niht gewonliche waere noch reht vnd claget mit nam[en] hin ze den Helden Rvod vnd H vnd Eber vnd ze Bvrcart von Rin an dem lantage ze Visherhvsen Do wart dem vor genanten Walt ir tailet wan solt ez ziehen in die chvntshaft vmbe ain warhait zer varenne vnd an fvinf man gesezet daz was herre C der alte von Grimenstain herre H vnd herre Bur die vocte von Wartense vnd Iohannes der anman von Rinegge vnd Vol von Hosten Vnd ir fvrent sich dez vnd saiton daz vf ir ait sit der Rin waer des riches rehtv frigv stravse daz da vf nieman vershaz gen solti von allem lande wan swaz vober die berge dar chaeme alt da hin solti drvchens gvtes alde gebvndes ie von dem sovme ainen phenninc swaz den Rin vf alde nyder vert Disv vrtail geviel ze Visherhvsen an den naehsten dvnrstage vor sant Margaretvn tac an den lantage Daz dis waer si so gebent herre Rvod von Gvtting[en] lant rihter in Rintal vnsern brief vnd insigel ze ainer rehter waerhait vnd ze ainer vestenvnge ze behabenne Acta sunt anno domini MCCLXXXXI