Charter Document - 04060302

In gottes namen amen Wir her Lvtolt vnd her Cvonrat gebruder von Landegge kvnden allen die disen gegenwurtigen brief an seihent alder hoerent lesen das alles das gut ze Slattingen das Wilhaln seilich zer Linden von Schafusen von vns hatte vnser reht lehin was von Kiburch vnd das wir die selben lehinschaft widir vf ze Kiburch an die herschaft habin gesent vnd vnziehin vns alles des rehtes vnd aller der lehenschaft so wir ie gewunnen zvo dem vorgenandem gutte an die vorgenanden herschaft ze Kiburch vnd vmbe die minne vnd die liebi so vns des vorgenanden Willehalmes seiligen kint zer Linden von Schafusen haint getan so bitten wir die herschaft von Kiburch das sv das vorgenande gut ze Slattingen des vorgenanden Wilhalmes seiligen zer Linden kinden ze rehtem lehin lihe Vnd das dis war sye vnd ovch steite belibe darvmbe geben wir die vorgenanden von Landegge den vorgenanden kinden disen brief beuestet mit vnseren insigeln zainem steiten vrkvnde Dis bischach an dem lanttage zer Lovben bi Frowenuelt do man von gottes geburte zalte zwelfhundert iar vnd nunzich iar vnd ain iar an der mitchen nach der manneuasenaht