Charter Document - 04060298

In dem namen vnsers herren amen Allen den die disin gegenwrtigen brief lesint alder hoerint lesin den kvnde ich swester Elizabet dv aebtissinne vnde alle der convent von Maggenovwe dc vns min vrowe vro Gerdrvt dv alte Gielin hat gegebin dvr got vnde dvr ir wirtes vnde ir kinde sele willen ein gvot ze Bvobintal dc zwelf stvche giltet dc wart svnderbare vnz genomen vnde an dem wehsel abe gesclagen do wir vmbe dc gvot ze Bvobental aber al wehsels mit ir vber ein kamen Mit den zwelf stvechen svn wir allv iar began vier iar gezit dc ist ir wirtes vnde hern Rvodolfes ir svnes vnde Heinriches ir svnes vnde ovch ir selber iar gezit nach ir tode vnde ze ieclichem iar gezite der vierer dv da vor genemmet sint svn wir dem convente win des selben tages geben von den drin stvche dv dar zvo gesezzet sint vnde swc wir denne vber den win erzvgon mvgen da mitte svn wir den andern dienest verrihten Ze dirre gesezzede binden wir vns dv aebtissinne vnde dv kelnerin die iezo ze Maggenovwe sint alder iemer nach vns werdent vnde swenne wir alder vnser nach komen niht verrihten dv iargezit alse da vor gescriben ist de sol dv priorin des conventes clagen in visitatione visitatori vnde swc da versvmet ist dc svn wir im geben dc er ez gebe sinem convente ze pitancie Dc wir staete behalten dc da vor gescriben ist darvber han wir disin gegenwrtigen brief gesigilt mit dem insigil vnsers herrin des abtes von Wettingin vnde mit vnsers closters insigil zeinem staeten vrkvnde Dir brief wart gegebin ze Maggenovwe anno domini MCCLXXXX nonas augusti