Charter Document - 04060295

Alle die disen brief ansehent vnd hoerent lesen den kvnd ich Elizabeht von Raprehtzwiller vnd grauinne von Honberc dc mine vogtlute von Bechu vnd von Wolrov mit dem dorfe ze Rihtliswiller ze kriege kament vmb ain gemainmerke dc ob den doerfern lit Dez wrden wir vertegdinget vnd verrihtet also daz min herre [] der abt von den Ainsidillon vnd ich vnd alle die dar zu hortont vnd anderhalp der comendur von Bubenkon vnd die dorflute von Rihtliswiller schaitlute dar uber namen vnd ez an die sazton Dc wc unserhalp her Vol von Rusegge vnd C der Truhsetze von den Ainsidillon anderhalp her Vol von Schonenwert vnd H der maier von Horgun Die ervurent sich dez mit geswornen aiden dc ain rihtunge wc beschehen ainhalp entswschent dem gottishuse von den Ainsidillon vnd minem vater grauen Rvodolf seligem von Raprehtzwiller vnd den vorgenanden vogtluten vnd anderhalp minem neuen hern Rvodalf von Wediswiller vnd sinen dorfluten von Rihtliswiller Die kament dez ainhelleclichen vberain dc si den selben schait bestatent wan siv die markstaine kuntliche vundent vnd dar zu saztont der siu bedorftont Vnd saztont dc entswschent den luten also dc dc selbe gemainmerke stete beliben sol vnd ez die lute iemer mit ain ander ainmoetecliche niessen sun Vnd dc diz allez stete vnd vnzerbrochen evweclich belibe von allermengelichem so gibe ich ze ainem waren urkvnde den brudern von Bubenkon vnd dem huse min insigel an disen gagenwrtigen brief Diz sahent dise gezuge her [] der abt von den Ainsidillon her Roediger Manesse her Rvod ab dem Turne her Hainr sin bruder her Richwin von Wolrov rittere Volrich von Wolrov Rvod der alt schulthaiz von Raprehtzwiller Jacop von Rambach der schulthaiz Peter sin bruder Hainr der Marschalk vnd ander bederbe lute genoege Diz geschach in dem jare do von gottes geburte wc zwelfhundert jar vnd nunzik jar do indictio wc III