Charter Document - 04060283

Wir Cvonrat von gotes genadun abte des gozhuses ze sante Gallen tuien kunt allen die dise brieue ansehent oder hoerent lesen das fro Gerdrut von Brunberc vor vns mit rehter vnd gemainer vrtailde behebit hat das Saeligen hof vnd die akker die dar in horten die sumelich burgaer von Wile von ir wirte Saelige ze lehen hetin das die ir rehtes lipgedinge si vnd das das nit enschadov den burgaeren von Wile an ir lehen vnd an den akkern wan das si in ir lehens gewer sun beliben Dar ubir ze ainem vrkunde gebin wir disen brief mit vnserm insigel Das geschach ze Bortenaer puel vnd dirre brief wart gebin do man zalt von vnsers herrin geburte tusent jar zwaihundert jar an dem zinstag vor sant Vrbanes tage