Charter Document - 04060281

Wir Elysabet greuin von Honberch vnd frowe ze Raprechsuil vnd ich Herman graf von Honberch kunden allen die disen brief sehent ald hoerent lesen dc wir dem edelen hern Wolrich von Rusegge han gegeben ein ros dc vnser lieber wirt vnd min feter grauen Hermans von Honberch graf Ludewich selig von Honberch hate versezet [] dem von Rinuelden einem burger von Berne vnd dvegen dc kunt fver vnsich vnd vnser erben suwen er der for genande burger im dem for genanden hern Wolrich von Rusegge de ros git ze loesenne dc er vnd sin erben von vns vnd von vnseren erben ganzelich an alle ansprahe lidich ist Dar nach so veriechen wir im dem forgenanden burger suwas wir im ander gulte sulen gelten dur recht dc wir im von dem vorgenanden rosse dest minre nicht sin gebunden Vnd dur dc dc er dest sicher si so geben wir im disen brief besigelt mit mime grafen Hermans ingesigel des ovch mich Elysabeten die vorgenanden greuin von Honberch wan wir nicht eigens ingesigels hanben an dirre sache begenveget Dis geschach ze Baden do von gotes geburt waren zewelf hundert jar in dem nuen vnd achzegoste[n jar] an sant Pangratien tage