Charter Document - 04060277

In dem namen vnsers herrin amen Allen den die disin geginwrtigen brief lesint alder horint lesin den kvnde ich swester [] dv priorin von Toesse vnde alle der convent dc wir vnde dv aebtissinne vnde der convent von Maggenovwe vns gerihtet han mit rehten teidingen vnde mit vnser beider schaden mit Bertolte dem schenchen von Liebinberc vmbe die ansprache die er hate ze dem gvote ze Waenzincon also dc er noch enhein sin erbe niemer me en hein an sprache ze dem selben gvote gewinnen sol Wir svn ovch die aebtissinne vnde den convent von Maggenovwe iemer vngemoet lazin vmbe die arbeit vnde vmbe den schaden den wir von dem selbin kriege gehebet han alder iemer hinnan hin gewinnen Dc wir alsvs vber ein komen sin des sint gezvge herre Volmar der tegan von Wintertvre vnde herre Heinrich der meiger von Wellenberc vnde herre Cvonrat von Slate vnde Rvodolf von Wellenberc vnde herre Stephan Hoppler vnde Heinrich von Altelincon vnde ander biderbe lvte Dc wir staete behaltin dc da vor gescriben ist dar vber han wir disen geginwrtigen brief besigelt mit vnsers closters insigel zeinem staeten vrkvnde Dirre brief wart gegebin an dem tvsindostin vnde zwei hvndertosten vnde nvn vnde ahzegosten iare nach der gebvrt vnsers herrin an sante Pantaleons tage