Charter Document - 04060275

In dem namen vnnsers heren amen Allen den die disen gegenwurtigen brieff lesent oder hoerendt lesen kunde ich herr Cunrat von Munchwylle der ritter dz ich vnd alle mine kind Volrich vnd Johannes mine sune vnd vro Gutte vnd vro Adelhaid mine tochtran gegeben han der aeptissinen vnd dem conuent ze Maggenow dz gutt dz mir ward gegeben ze Aschlicon zu miner ersten wirtinen dz selbe gutt ward dem closter ze Maggenow von vnns gerichtet mit hern Lutoltz hannd von Baebingen des recht aigen es was der gab es fur ain ledig aigen mit allem rechte in holtze an velde vss vnd inne der aeptissinen vnd dem conuent ze Maggenowe Waere aber das dz closter von mir alder von minen kinden die da vorgenempt sind alder von vnnsern erben in dehainen schaden alder anspravche komme da sond wir dz closter verstavn vnd sond es vnschadhafft machen Ich kunde ouch dz Adelhaid min tochter ir pfrunnd haut vffgegeben dem closter ze Maggenowe Das diß ain wavrhait sye dz da uorgeschriben ist des sind gezuge herr Cunrat der lutpriester von Bichiltzse vnd her Rudolff der schult[heis]s von Wyl vnd herr Eberhart von Lovmisse vnd her Hainrich von Huntzicon vnd dirre brieff besigelter mit minem insigel ze ainem statten vrkund Dirre brieff ward gegeben ze Wyl nach der gepurt Cristi MCCLXXXIX javre an dem tag sancti Stephani pape