Charter Document - 04060270

Allen die disen brief an sehent oder horent lesen kunden wir Nicolaus vnd Cunrat von Wagen daz wir dur vnser notdurft willeglich vnd vmbetwunglich eine halbe hube ze Wagen vnd den halben zehenden ze Lutisbach vmbe zwelf march silbers Rudolfen von Wagen vnserm stuffatter verkovfet vnd geben haben ze besizzenne vnd ze niezenne ime vnd sinen erben mit allem dem rehte als wir ez hatten Wir uergehen ovch an disem selben brieue daz wir der vorgeschribenen zwelf marchan von ime voileglichen gewert sigen Wir verzihen vns ovch alles des rehtes so wir an dem vorgenanden gute hatten vnd dar zu aller der ansprache so wir vmbe daz selbe gut gegen ime alder sinen erben an gerihte geislichem alder weltlichem alder ane gerihte iemer kundin alder moehtin gewinnen Har vber ze einem vrkunde geben wir disen brief besigelt mit dem ingesigele des rates von Raprehtswil die dur vnser bette disen brief besigeln hiezent vnd uerhangten Dis geschach in der vorgenandun stat ze Raprehtswil in dem jare do man von gottes geburte zalte zwelfhundert vnd ahzeg vnd nun jar Da waren ze gegen Wernher vnd Volrich von Rambach Walther der Bizzener Rudolf von Hasela Walther der Kuffersmit Rudolf an dem Graben der Leimer Berhtolt von Buslikon Cunrat der Murer vnd sin bruder Wir der rate von Raprehtswile vergehent daz wir dur die bette der vorgenanden Nicolauses vnd Cunrates von Wagen disen brief mit vnserm ingesigele ze einre stetgunge vnd ze einem vrkunde des vorgeschribenen kovfes besigelen hiezent vnd verhangtent