Charter Document - 04060269

In dem namun unsurs herrun kunde ich her Eburhart uon Bichulnse der truhseze ze sante Gallun ist allen den die disun brief lesunt alder horrunt lesun das ich gegebun han ze choufunne das gut ze Hutstal vnde das holz unde die ruti uffun Chizaberg vnde das holz uffun Rugebein den frowon uon Tennincon unde deme closter mit allem rehte vnde swas zvo Hutstal horut Jch han dien frowon gelobut das selbe gut das hie uor genemut ist ze rihtunne von sante Gallun an ir scadun ze einum zins eigun inrunt einum iare swenne der abbut uon sante Gallun vnde das capitul geeinbert werdun Das ich dis leistende si an alle geuerde das hie uorgescribun ist dar umbe han ich inen ze burgun gegebun hern Eburhartun von Burgulon vnde hern Eburhartun uon Eilgo vnde Rvodolfun von Roscahc vnde Rudegen uon Werdegge Were abur das das ich nut leisti das hie vor gescribun ist vnde ich gelobun han so sun sich die vier burgun vnde ich entwrtun ze Wintertur alde ze Wile in rehte gisulscaft vnde sun da ligun ane alle geuerde vnz ich inen das gut rihte Were das das dirre vier burgon eine sturbe e ich inen das gut uurrihte so sun die drie sich entwrtun vnde ich in rehte gisulscaft inrunt einum manot der su manot vnz ich inen den vierden gebe Das dis stete bulibe das hiei uor gescribun ist des ist gezug her C der luprester von Bichulnse H der Giel Eber uon Sternege Ber von Hugenberg vnde dirre brief busigultur mit minum insigul vnde der burgon insigul Dirre brief wart gegebun ubur tusunt iar vnde zwei hundurt iar vnde LXXX iar vnde ahte iar nach deme geburtlichum tage unsurs herrun