Charter Document - 04060265
| Charter Number: | 04060265 |
|---|---|
| Cartulary Title: | Chartularium Sangallense IV [St. Gallen] |
| Charter Language: | German |
| Charter Origin: | Religious |
| Charter Type(s): | Promise |
| Date: | 1288 |
| Date type: | Internal, A.D. |
| Resource Link(s): |
Monasterium.net |
Charter:
Wir Wilhelm von gottes gnaden abbet von sante Gallen tvon kvnd allen dien die disen brief sehent alder hoerent lesen daz wir alle die hofstete vnd alle dv gveter dv wir vnd vnser gozhus von sante Gallen alder vnser burger alder vnser gebvrn haben inderthalb dem vsserm borte dez graben ze Swarzenbache den man witeron mag als vil man wil haben gelihen hohen herron herzoge Albreht vnd herzoge Rvodolfe herzogen von Osterrich grauen von Habspurch vnd von Kiburch lantgrauen ze Elsaze vnsers herren dez Roemschen kvnges svnen ze rehtem lene Wir svin ovch schaffon swaz vnser burger alder vnser geburn da hant daz sv vns daz vf geben vnd svlen daz die vorgenanten herzogen von vns ze lehen haben vnd haben ins gelihen vnd haben in dar vber geben disen brief besigeld mit vnserm ingesigel Dise brief wart geben ze Kostenze an dem nesten mentag nah dem zwelftem tage do von vnsers herren geburte warn zwelfhundert jar ahzeg vnd aht jar