Charter Document - 04060258

In dem namen vnnsers heren amen Kund ich her Eberhart von Bichelsee der trucksaesse von sant Gallen allen den die disen gegenwurtigen brieff lesent alder hoerent lesen dz ich ledeklich vnnd mit allem rechte von mir vnd von allen minen erben ain schuppis ze Nuforen die da haysset die Zehinda die min recht aigen was die han ich gegeben Hainrichen dem Giele von Schovwenberg ze rechtem aigen ze tragende der aeptissinen vnnd dem conuent von Maggenowe den dz vnnd ander gutt min vatter gab ze kouffen Ich kund ouch an disem brieffe dz min wirtine fro Vrsula vffgeben haut Adelhaiden die Zehenderinen vnnd ire kind die ir morgen gavb wavren ledeklich vnnd willenclich vnnd vnbezwungenlich vnnd alle anspravch von ir vnnd allen ir erben Hainrichen dem Giel ze rechtem aigen ouch ze tragende der aptissinen vnnd dem conuente von Maggenowe ir sind die selben lutt widerlait die sy vfgegeben haut mit Volrichen dem kellner von Tuffenbrunnen vnnd siner wirtinen vnnd mit sinen kinden vnnd mit siner mutter vnnd mit allen sinen geswustergiten Waere aber dz jeman die lutt alder dz gutt dz da vorgenemt ist dem closter alder dem conuent anspraeche da von sy ze schaden kaemint von vnnsern wegen den schaden sol ich vnnd mine erben inen ab tun Dz diß ain wavrhait sye dz da vorgeschriben ist des sind gezuge herr Cunrat der lutpriester von Bichelsee vnnd Rudolff von Roschach vnnd Cunrat von dem Houe vnnd Hainrich Genseli vnnd Gerbolt der amman vnnd dirre brieff besigelter mit minem insigel vnnd Rudolffes insigel von Roschach ze ainem staetten vrkunde Dirre brieff ward gegeben ze Bichelsee nach der gepurt Cristi MCC vnnd im LXXXVIII javre an dem trytten tag nach sant Gregoryen tag