Charter Document - 04060257

In gotis namin amen Wir von gotis gnaden abbit Wilh von sante Gallin kvnden allen den die disen brief sehint alde horent lesin dc wir vnsirm liebin bvrger hern Cvonrat dem Covfman von Wil habin die mulistat ze Rikembach vnde swc dar zvo horit als si Bertold vnde Volrich die Mvller hatten gelihen zi rehtem lehin vmbe drige marc silbers Costentzer glotis vnde vmbe den dienst so er vns vnde vnserm gotzhvs hat getan vnde noh tvot Dc diz war si vnde stete belibe dar vmbe so henken wir der vorgenant abbit Wilh vnsir insigel an disen geginwurtigen brief Diz bischah in der stat ze Wil nah vnsirs herren gebvrte Iesv Christi tusint iar zweihvndert iar vnde dar nah in dem aht vnde ahzgostem iare an der nehistvn mitwochin nah sant Mathies tult dez zwelfpotin Wir der vorgenant abbit Wilh kvnden ovch dc die akir die zi der selbin mvli horint zinsent in den hof ze Rikembach iargelich zwei viertil kernin sante Galler mes