Charter Document - 04060252

In gottes namen amen Allen den die disen brief sehint ald horint lesin tvon ich Harthman von Baldegge kvnt dc vmbe den schaden so miner herrin die hertzogin von Osterrich vnde ir lvte hant ginom[en] zi Swarzinbach von mines herrin abt Willehalms von sant Gallin bvrgern ze Wile vnde von andern sinen dienern gimom[en] hant der vorginande herre von sant Gallin wirbet vnde werbin wolte dc er in mines herrin des kvniges vnde siner svne der vor ginanton hertzogon hvlde vnde ginade kom[en] mohte Darvmbe so warb er dc ich soliche svone nam vnde ginom[en] han an miner herrin der hertzogin stat als hie nah geschriben stat Min herre der vorginande abt Willhaim von sant Gallin hat gisworn in mines herrin hof des kvniges zi varne vnde han ich Harthman von Baldegge mit im zi varne gilobt Vnde svlnt da einin schidman oder zwene nemin min herrin die hertzogin sweder si went vnde als manigen sv nemint als manigen sol der vorginde abt von sant Gallin nemin vnde sol graue Lvdwic von Othingen gimein man sin vmb solhe schache vnde schaden als hie vor geschriben stat min herrin die hertzogin vnde den vorginanden abt zi scheidinne nah minnen older nah rehte ob er ander ginade niht vinden mac Wer abir dc der vorginande graue von Othingen sich niht mohte alder niht wolte an nemin der sache so svln min herrin die hertzogin vnde der vorginande abt ein andern gimeinin man nemin an siner stat an alle giverde Vnde svlnt die schidlvte older der gimein man ob die schidlvte zirhellint in einin manode nah dem tage so der vorginande abt in mines herrin des kvniges hof kvmit gebvnden sin min herrin die hertzogin vnde in zi scheidinne nah minnen ald nah rehte ob er ander ginade niht vinden mac Es ensol ovch der vorginande min herre der abt in mines herrin des kvniges hof niht lenger gibvnden sin ze sine vmb dise sache danne einin manod dor dc er miner herron des kvniges vnde der hertzogin hvlde dest e irwerbe Dc abir er stete habe swc in die schidlute heissint older der gimeine man ob si zirhellint dc hat er gisworn vnde hat ovch Singenberc die bvrk mit lvte vnde mit gvote vnde mit allir der ehafti als si herre Cvonrat der schenke von Landegge von sinen wegin hatte in siner giwalt mir in mine giwalt genthwurtet also lange zi habinne in miner giwalt vntz dc er vollevure die besservnge die in die schidlute ald der gimein man heissint tvon Swenne abir er die vollevurt so sol ich im die bvrk zihant wider enthwurten des hab ich zi den heiligon gisworn Wer abir dc von mines herrin des kvniges older miner herron der hertzogon older von andern sachen denne von mines herrin des vorginanden abts wegin gibreste dc si niht gischeidin wurdin older abir dc min herre der kvnic older mine herrin die hertzogin sine svne niht woltin stete habin die vorginanden svone so sol ich ime sine bvrk ze Singenberc wider gebin des han ich zi den heiligon gisworn Vnde sol dar nah der vorginande min herre der abt vnde alle die sinen von minen herron dem kvnige vnde den hertzogin vnde allen den irn vierzehin tage vride habin Swc ovch sid dem tage de Swarzinbach verbrant wart miner herron des kvniges vnde der hertzogin diener oder helfer hant gitan mines herrin der vorginanden abtis dienern oder helfern older sin helfer iren helfern dc ist allis zeiner gantzer svone gimachot ane tot givehde die wir dar zvo niht givangin habin Daz abir dis dc hie vor geschriben stat stete bihaltin werde vnde dc ich die vorginanden svone ginom[en] han vnde gitan darvmbe hab ich der vorginande Harthman von Baldegge disen brief gebin gesigelt mit minem insigel zeinim vrkvnde der warheit Dis gischah vor Wile vff dem velde do man zalte von vnsers herrin gebvrte zwelfhvndert iar vnde siben vnde ahtzic iar an dem nahesten samstage vor vnserre frvwen thvlt zi herbist